絲絲講場：內地蘇寧開店有錢唔收

點玩法？先要連接銀行卡，通過「蘇寧金融」應用程式嘅面部識別後，客戶只需喺入口處經相機掃描面部就可以入舖。

找數時，顧客只需攞住件貨走過付款通道，系統自動識別係邊個同買咗啲乜，戶口扣數，過程唔使15秒。

新舖會賣體育用品與球會（好似國際米蘭）紀念品、小配件、個人電子產品、食品與消費品。

Sorry，香港無份，四間店全部喺內地開，分別係上海、北京、重慶與徐州。

內地「無現金化」已經普及到，有北京伴娘喺婚宴上，條頸掛住個支付寶QR Code，畀親友即場畀人情！濟南嘅丐幫，唔止頸掛QR Code，仲貼埋落乞兒兜度，聽講仲有人帶埋POS機去行乞！最爆嘅係，早排寧波有賊打劫，竟然要事主掃QR Code畀錢！

金管：畀錢最緊要有得揀

香港落後？金管局高級助理總裁李達志尋日喺該局專欄《匯思》提到，香港點同呢。內地鈔票最大面額係一百蚊，買幾千蚊嘢就要用幾十張銀紙；香港偽鈔率僅百萬分之一；全港自動櫃員機總數超過3,000部，廿四小時提、存款都咁方便。佢意思係，唔好一味講「潮」，最緊要有得揀（兼容現金與電子支付）先係便民利商。

余絲韻