Market Insight：科網股升勢火上加油

散戶對閱文趨之若鶩

另外，騰訊控股（00700）ADR比香港收市再升1.7%，夜期高收，預示今日期指結算日早市，大市向好大戶進一步推高結算價的可能性相當大。

騰訊親生仔閱文集團（00772），中型券商孖展早就借爆，由於集資額比之前隻眾安在綫（06060）細，誇張的超額倍數幾成定局，尤其見識過眾安由招股價59.7元，掛牌短短幾日搶至97.8元，升咗六成三，珠玉在前，大家自然趨之若鶩。

不過，有一點要注意，是閱文的超額回撥部分較眾安彈性，如超購倍數在50倍以上，最高33%股份會撥回去IPO散戶部分，同眾安偏好大戶，差不多三分之一貨源被軟銀事先認購好唔同。閱文貨源相對較分散，有冇得重演眾安的炒作盛況，實在難料。

既然大家都係想搵快錢買嚟賣，唔好講基本因素，都係嗰句，記得要見好即收，升得太誇張仲上唔上車就自己諗。

騰訊隨時再度轉強

上周五美國科網股因季績刺激大升，納指裂口升144點收6701點，創近一年的最大單日升幅。閱文未上市先興奮，未截飛已超購大爆燈，嚟緊十一月會否是科網股天下？

既然美國科網股當旺，無理由唔搵幾隻中資科網股落鑊，騰訊固然係膽，睇怕應該都要上番10日線350.3元樓上，解除短期進一步調整的威脅。

上星期中保監一份網上文件，拖累隻眾安跌穿80元，如果短期升得番上去，閱文的認購資金回籠，返去炒眾安的機會都唔細。加埋雲計算技術的金蝶國際（00268）同埋網上教育股網龍（00777）一併考慮，應該都無走雞。

十九大已於上周閉幕，今日係十月期指結算，展望短期市況，相信焦點會返回公司季績同基本因素身上。上周五古勝講過，隻中國人壽（02628）首三季賺268億元人仔，查實乃街外預測中上限，季績前無厘頭回軟，結果上周五即彈2.8%。

長汽捱過最壞時間

港股企住兩萬八樓上的逾十年高位，尤其當炒板塊，芬佬對業績要求愈來愈高，唔大超額都頂唔住個處於極為高位股價。

就好似隻廣汽集團（02238），首三季利潤升近六成，數字上當然唔錯，但如果睇番半年盈利增長六成二，咁第三季只算延續強勢，講唔上係更上一層樓，結果上周五股價一度升到22.05元，創歷史新高後倒跌的反高潮，由即市最多升6.5%到埋單倒插4.2%，高位摸咗貨的隨時一殼眼淚。

結果廣汽的表現，與冇期望就冇失望，今年業績「差開」，盈利跌六成的長城汽車（02333）2.8%跌幅相比仲要差。

由於提高折扣及新車推廣開支大，大行睇長汽睇得幾淡，尤其高盛季績後，將目標價再推低，由5.92元降至5.72元，繼續畀沽售評級。

不過，高盛自己睇好一八年長汽每股盈利可以反彈，由今年預測的每股45分人仔，升返去出年73分人仔，業績最壞時間應該快將過去。

古勝