絲絲講場：庫克趕工造機又造人？

培育CEO有咁多得咁多

話說早幾日芝加哥新Apple Store開張，庫克喺新舖接受訪問時話，「我作為CEO，有責任要盡力培育有咁多得咁多接班人出嚟」，佢仲話已經做緊，至於幾時有乜決定就由董事局話事。

絲絲聽落都有啲黯然，即使貴為Apple壇主，打工仔始終係打工仔，預咗總有日隨時畀人叫起身。

敢言激進 唔憂侵侵打壓

記者打蛇隨棍上，問接班嘅會唔會就係庫克旁邊一同受訪嘅副總裁阿倫特斯（Angela Ahrendts）？佢原本係Burberry CEO，三年前被庫克撬過檔，有傳過佢係接班大熱。大熱即搶答：「傻啦，假新聞嚟嘅！」明嘅明嘅，叫庫克點答啫，咁快手幫老細解圍，醒目！

講到AR（擴增實境），庫克話AR最美麗之處，就係令虛擬世界變成實質世界嘅放大器，話AR將會改變一切一切。佢仲提到電腦程式係今時今日必須嘅語言，所以公司做咗唔少嘢希望納入學校課程。

查實既然乜都可以網上訂購，Apple為乜仲要開實體店？庫克話呢啲唔止係間舖，而係社區嘅一部分。

喺好多公眾議題上，好似移民問題與反對種族歧視等，庫克一向敢言兼與特朗普政府唱反調，怕唔怕連累公司被打壓？佢斬釘截鐵話「NO」，話一向不談政治，只係討論政策，話公司內好多有色人種員工，既關乎到工作環境，就要出聲。有Guts得嚟又小心，CEO唔易做！

余絲韻