絲絲講場：索羅斯做「慈善鱷」捐八成身家
國際大炒家索羅斯喺投資市場上令人聞風喪膽，估唔到佢咁熱心於社會議題同慈善工作，最近仲將180億美元資金轉移到旗下「開放社會基金會」，令後者一躍成為以資產計美國第二大慈善組織，僅次於微軟創辦人蓋茨夫婦嘅蓋茨‧梅林達基金。
根據《福布斯》資料，索羅斯身家喺資金轉移前約230億美元，所以呢筆180億美元資金相當於佢接近80%嘅身家。
索羅斯喺成立索羅斯基金管理後九年，亦即一九七九年成立「開放社會基金會」，呢個慈善組織參與超過100個國家嘅項目，主要係難民救援及公共健康等議題相關嘅工作。
索羅斯將巨額資金轉移去基金會嘅原因，亦可能同想交少啲稅有關，皆因美國國會喺○八年取消稅務寬減，要求對沖基金喺今年底前將海外資金調回國及支付累積稅項，唔少基金經理因而將資金轉去慈善基金，包括自己旗下嘅慈善基金。
余絲韻