Market Insight：港股破頂要等埋騰訊

睇番數據公布後，十年期美債孳息回順至2.28厘，高息債的音樂椅遊戲應該仲可以玩多陣，近排無厘氣勢如公用及房地產信託基金（REITs）之流，應該可以有番啲支持。

上周五恒指夜期高收，較日市再升154點，預示今朝港股再衝頂的機會相當大。

不過，北水愛股依然強勢，吉利汽車（00175）升0.9%，瑞聲科技（02018）衝高3.7%，股價返回近三周高位，大笨象滙豐控股（00005）委任范寧出任行政總裁，股價變動唔大，微跌0.1%收報77.2元。

股王騰訊（00700）傳阿爺計劃入股，加埋電子書業務閱文集團通過分拆上市聆訊，不過周末假期前夕，指數相關買盤仲係流於審慎，股價最後微跌0.2%收349.2元，睇美國掛牌OTC高收，睇嚟個市如果再破頂，今日無咗騰訊應該唔成事。

跟北水口味買中興

港股經歷咗兩年多時間，終升穿大時代高位28,588點，可惜破位後又再吽吓吽吓，上周五得番123點波幅。施政報告之後，魚缸炒鬼又解釋話要等十九大，講真，潛台詞都係等北水埋位再炒上啫。

中國官方目標在二○二○年實現5G網絡達到商業營運，未來幾年相關的基礎建設投入驚人，絕非純粹吹水假大空。相關概念股炒起上嚟硬淨得多，上周初中興通訊（00763）兩支大陰燭回落，到上周四、五經已沿着10日線拗腰再發力。依家魚缸搵食，唔睇住北水口味注定無運行。

上星期高盛同富瑞都出報告唱好中興，後者認為中興有機會在國際市場上增加5G市場份額，目標價睇40元，以上周五收市價29.1元計，仲有超過十皮先到目標價。

長飛光纖具龍頭優勢

近日中國聯通（00762）開始為一七、一八年幹線光纖進行招標，規模63萬芯公里，預期中國移動（00941）的一八年招標也即將展開，來自內地三間主要流動通訊商的光纖光纜需求將會因為5G的建設持續。

估值較A股同業便宜

光纖光纜生產商長飛光纖光纜（06869）今年三月完成擴產，額外500噸VAD及500噸OVD產能投入，在內地光纖廠商供求依然緊張之下，預料可以受惠於中國5G建設的需求增長高峰期。

作為行業龍頭，上半年業績已看到市場環境下的好處，營業額及純利分別增加26.2%及59.4%，盈利5.65億元人仔，已相當於去年全年八成，估計全年業績後市盈率回到15倍左右，較A股同類型股份便宜，且擴產好處在一八年業績才完全反映，近日股價沿着10日線發展，強勢畢呈，短期可以20日線約28.5元止蝕，短期目標先睇36至38元。

古勝