孖妹S檔案：吼實3「非常」時刻窮忙股友有金執

香港打工仔唔少都係「窮忙族」，在職貧窮又冇前景，其中有一小撮人識得間中喺股場搵飯食。不過，賺錢機會又點止九點半至四點呢段恒常開市時間？其實大可把握其他「非常」搵錢時機，就等我哋搵專家教授獨門秘技，助你生活好過啲。

路數1：新股暗盤夠靈活方便增持減磅

開市時間：新股上市前一個交易日下午4:15至6:30（半日市下午2:15至4:30）

主要市場：輝立証券、耀才證券、一通證券

陳：輝立証券經理陳英傑（Jasper）

Kitty：我班姊妹成日話你係「新股小王子」，實有原因嘅……新股暗盤喺香港暫時得3間券商做，唔通真係貴族玩意？

陳：想參與新股暗盤其實好簡單，首先要喺券商有個證券戶口，以輝立為例，普通證券戶口已可以參與交易，若選擇用孖展作刀仔鋸大樹，一般孖展戶口按倉比率係約五成，有一半散戶、一半機構客戶參與交易。嗱，普遍股票交易係奉行T+2交收制度，暗盤交易就行緊T+3交收，即係掛牌日之後兩日先交收，到時孖展就要補齊錢，如果唔夠錢就會被迫喺指定時間前，沽出唔夠錢畀嗰部分嘅股票。當然，散戶要睇實有乜新股上市，並可選擇在暗盤時段進行「即日鮮」，或喺暗盤時段買入，正式掛牌後伺機沽出。

多頂頭槌飛揀得過

陳：若散戶對新股有興趣，雖然大可喺新股接受公開認購時申購，又或者等佢上市後再掃貨，但有機會錯失良機。暗盤可提高投資新股嘅靈活性，抽中太少貨，就可以增持；抽中太多貨，又可以減持。以早前超購417倍嘅半新股恆誠建築（00994）為例，佢算係熱爆嗰Type，唔少抽唔中或者唔夠貨嘅投資者喺暗盤市場加注，當日輝立暗盤爆升超過七成，皆因一開市就係咁搶貨，所以暗盤市場亦有唔少短炒機會，不過恆誠建築首日正式掛牌只升約三成，走勢唔理想，所以分分鐘喺暗盤高追咗。

彩兒：我聽玩開暗盤嘅股友講，透過輝立暗盤經紀代號九百幾號落啲盤，通常係幫券商掃貨，如果見到佢哋嘅買盤，咁呢隻新股多數有運行。

陳：暗盤開市第一口成交價就係開市價，頭15分鐘同埋臨收市前半個鐘係最活躍，所以要最留神，頭15分鐘就要決定追揸沽策略，價格合理就要拿拿聲落盤，最緊要眼明手快！如果想提高勝算，最好就揀超購倍數高、多頂頭槌飛（B組最高股數申請）嘅股份；緊記細細粒容易食，皆因吸引炒家，股價波動有「錢途」；成交密、擘價就冇咁闊，一般嚟講，以我哋行計，成交以億元計才算係活躍！好似隻內蒙古能建（01649）咁，暗盤參與者得小貓三四隻，見勢就咪亂玩。

路數2：夜期制度優化玩法吸引

開市時間：下午5:15至晚上11:45

潘：香港財經資訊及教育研究部主管潘玉琪

彩兒：記得初初有夜期嗰陣，每晚100張成交都冇，所以畀人話係小圈子遊戲，近期好似脫胎換骨咁？

潘：今年年頭開始夜期成交升得幾快，同港交所調整咗交易時間、市場受落咗、成為接軌工具有關，以上周中，九月期指成交計，夜期日均成交約1.2萬張，日期就有八萬幾張，夜期張數已佔全部張數約13%。

輝立陳英傑稱，暗盤可提高投資新股的靈活性。

香港財經資訊及教育潘玉琪表示，初炒期指的人士不少先由夜期起步。

恒指期貨合約資料

炒夜期必睇實美市

潘：今時唔同往日，以前成交稀疏，價格冇代表性，好多時歐股、美股出現大升或急跌，就會拎夜期去做啲極端價位，好多時會有較靚價去平倉；依家成交大咗、規模化咗，走勢冇咁飄忽，仲可以配合技術分析添。其實日期價格、時間比例，升跌高低位有一套周期，依家可以延續到夜期，有機會做對沖套戥。以前夜期Cycle係375分鐘，同日期一樣，自從夜期加時後，就變成390分鐘一個循環。依家市場上多程式交易，跟價位、Cycle比例、時間炒，所以自己會先分析市況，再睇Cycle同時間去短炒。

Kitty：睇嚟我啲窮忙族朋友脫貧有望，夜晚放咗工，仲可以繼續炒！

潘：想炒夜期，唔關注美國市場係炒唔到，好受標指細期（迷你期貨）走勢影響，夜期韻律同佢有同步傾向，有衍生產品投資者好鍾意將標指細期同恒指夜期做對沖，例如港股弱、外圍市況強時，就同步沽港期、買標指細期。美國通常周四、五出經濟數據，好似就業數據咁，若然與預估數據有偏差，就會令港期成交、波動性俱增，所以就要特別留意；港股ADR派息時間一般遲港股1至3周，我哋可以利用價差做炒作，主因基金會「炒派息」，亦會影響夜期高低水。

潘：有好多非專業投資者夜晚放工先有時間專心睇市，初炒期指嘅人士唔少都係由夜期起步先，港交所下年第一季喺夜期有機會加入期權，咁就更令人放心，而且年尾仲會加時到凌晨2點，同外圍市況有更多重疊時間，避免價格陷阱，即使見到美國有乜依郁都可以靈活走位。