Market Insight：內房股逐浪 打醒精神

上周五港股ADR同新加坡黑期都齊齊谷到上27,900點樓上，預示了周一港股個市會開高。

炒風已擴至三四線

上周五內房股強到無朋友，內地熱錢開始由一、二線擴散到三、四線內房，升得最勁係沿海家園（01124），升咗18.4%、百仕達控股（01168）升14.5%以及中渝置地（01224）升14%。睇見近兩星期累積升幅，閣下有貨固然替你高興，不過，中央講到明調控措施短期不撤，價量齊跌的因素會逐漸在一八年業績浮現。內房股的逐浪遊戲，絕對唔啱承受唔到風險的普羅股民。

上周五已提過，古勝愛股之一新鴻基地產（00016）業績對辦，加上新一屆政府的土地政策可能對持有大量農地發展商有利，係唔想食住驚風散入市的股民最佳之選，上周五業績後試完10日線132.5元，即日拗腰大幅收窄跌幅，短期要睇實。

地緣風險未宜太輕視

家陣世界真係變得太瘋癲，以為肥仔金一而再試射導彈橫越日本經已夠癲，卻依然不敵股民，可以視若無睹當佢無到。上周五港股在裂口低開之後買番轉頭，最終倒升30點收報27,807點。

問番一句，兩萬八頂到冚，等藉口回吐的港股，恐怕無人開市前估到結局。

承接亞洲區股市冷靜到得人驚的表現，上周五道指直頭就省去裂口低開扮驚的部分，由頭升到尾，再創歷史新高，收市升64點收報22,268點，三大指數皆有進帳。「戰時黃金」呢句固然無成真，國際金價偏軟，縮番落九月初起步位。

被視為恐慌指數的VIX，依舊貼實七月創出的超過廿年低位，股市既唔慌亦唔驚，投資者為牛市高歌。所謂唔怕一萬，最怕萬一，肥仔金下次唔再玩空彈，又或者日、韓忍唔住試用導彈攔截，若成功，當然要有打仗的心理準備；失敗，表示子彈射子彈只係西部牛仔拋浪頭的屎橋，到時大家至識驚，個市會變成點真係唔敢去諗！

新股王勢掀認購潮

近排科技及教育類股份之外，新股都值得留意。新加坡建築股BHCC（01552）威咗一日之後縮番落嚟，始終size細小，吸引唔到基金的胃口。

不過，打落今明兩星期有5隻新股登場，暖場之後，真正重頭戲係內地金融科技保險公司眾安保險（06060），本周四截飛，下周四掛牌上市。

呢隻集資額過百億的眾安來頭唔細，由馬化騰、馬雲及馬明哲組成互聯網金融股，仲有中金及大摩等基金股東坐鎮，自不然令市場有所期望，招股價介乎53.7至59.7元，肯定以大價股姿態登場。

內房股百仕達突然炒上，正正因為間接持有眾安約5%股份，估計掛牌後眾安整體市值至少過千億元，以5%計值50億元，百仕達上周五市值不過48.5億元，難怪被視眾安為影子股。隔咗兩層持貨，點計都應該有資產折讓，既然眾安群星拱照，唔少身邊老友都磨拳擦掌準備孖展入飛，即使只係認三幾手，實在不妨碰碰運氣，應該賺到餐茶的機會相當大。

古勝