絲絲講場：庫克袋住iPhone 8通街走？
近期有關iPhone 8真身圖片日日新鮮，啱啱外媒就報道，蘋果CEO庫克喺近日前往辛辛那提訪問了蘋果供應商工廠，庫克喺Twitter分享咗一張佢向工人們講話嘅相（圖）。不過有眼利嘅朋友發現庫克褲袋裏藏着一部手機，而且呢部手機機身以乎有點「長身」。難道就係傳說中嘅iPhone 8？
喜歡尋根問柢嘅媒體開始分析這部手機到底係唔係即將發布嘅iPhone 8。媒體推敲嘅角度包括根據庫克6尺3寸嘅身高推斷庫克戴嘅眼鏡寬度為120mm，然後根據比例推斷庫克褲袋中嘅「iPhone」係一部156x74mm嘅設備，比iPhone 7 Plus短少少，亦細少少，尺寸與之前曝光嘅iPhone 8嘅尺寸脗合。
40%果粉換機諗住買
諗唔到庫克竟然隨身攜帶一部iPhone 8？之不過，iPhone 8聽講要賣成千美元起，據市場調查機構Fluent調查結果顯示，所有打算升級到iPhone嘅人入面，約有40%人諗住買iPhone 8。呢項調查嘅對象係美國成年人，一共收回2,117份有效回覆。
另外，同時在另一項針對iPhone用戶忠誠度嘅調查中，將近一半受訪者承認他們已經購買過至少4部iPhone，今次買多一部iPhone 8又何妨？
余絲韻