絲絲講場：買番X.com域名馬斯克有搞作？
人稱科企「Ironman」嘅馬斯克有鋪連環創業癮，出名一瓣未完又開第二瓣，好似佢搞嘅電動車企業Tesla（特斯拉）同太空探索科技公司SpaceX咁，各自反轉行頭。佢最近又無情情忽然買番自己陳年創立嘅公司個域名「X.com」，科技界即刻打個冷震，喂佢今鋪又搞乜？
馬斯克公開話多謝PayPal（網上付款服務公司）肯賣番呢個「X.com」域名畀佢。個價？兩邊都封口。買嚟做乜？馬斯克話純粹對個名有感情，目前無計劃搞咩。
感覺梗深啦，事關有佢被人踢走嘅一段往事。話說佢九九年創辦X.com搞網上銀行，○○年合併成為依家嘅PayPal，馬斯克當時仲做埋公司CEO，不過就迅即同其他話事人不和，人哋趁佢年尾飛緊去澳洲度假時，將佢踢出董事局！佢當年30歲都未夠。
余絲韻