絲絲講場：想免費同股神食飯有計！
三唔識七想同股神巴菲特食餐飯？得，去參加每年嘅慈善午宴競投，但冇2,000萬港紙都唔使諗。但有個80後憑一招，居然唔使同人爭，就可以約到股神食晚飯，仲傾足三粒鐘。佢用咗咩秘技？
呢位32歲嘅奧肖內西，係一位紐約基金經理，佢自去年開設咗個Podcast（播客節目），個節目成因好簡單，純粹有次佢讀到本好書，於是電郵作者約食晏，結果就衍生出將對話記錄低嘅諗法。
識到佢老友 跟埋吹水
佢搞咗冇幾耐，就約到對沖基金經理Ted Seides見面並錄製節目。Ted Seides最出名，就係同巴菲特嗰場十年賭局，對賭股市表現，結果慘輸。但原來兩位賭局主角係好朋友，於是奧肖內西就機緣巧合咁參與到一場非比尋常嘅飯局，早排同Ted Seides一齊飛去奧馬哈同股神食餐晚飯。
出發前，就連奧肖內西阿爸（佢阿爸亦係華爾街著名基金經理）都同佢講，話呢餐飯市值差唔多300萬美元（約2,340萬港元）。
奧肖內西話，從來無諗過個Podcast會為佢帶嚟乜嘢，佢重視過程多於結果，估唔到咁反而引發出神奇嘢。飯局過後，奧肖內西話發覺股神雖然叻，但亦係普通人一個，鍾意吹水、講古、講笑同識新朋友，見到股神咁「貼地」，更令佢覺得一切皆有可能咁話。
余絲韻