絲絲講場：Uber員工撐CEO復職

最近，美國電召汽車應用Uber行政總裁卡蘭尼克畀董事會逼宮而黯然辭職一事，轟動成個硅谷。但係，原來有一大班Uber員工撐佢。據稱，有員工仲即時透過電郵發起請願信簽名，要求畀卡蘭尼克復職。

話說有員工知道卡蘭尼克被迫辭職嘅消息後，表示唔同意公司嘅決定，仲向全體員工發出電郵請願信，內容指「Uber就係卡蘭尼克，卡蘭尼克就係Uber，佢哋係不可分割嘅整體。」至今請願信已經有1,100名Uber員工簽署，佔公司全球員工總數12,000人差唔多一成。

雖然Uber董事會希望變革，改變公司喺卡蘭尼克之下男權當道嘅文化。但係有變革管理專家就警告，辭退創辦人分分鐘會令到公司冇咗原本嘅特色。

好似一位Uber前員工戴姆就話：「我哋已經睇到雅虎嘅衰落，正因為繼任嘅CEO並冇繼承公司嘅靈魂。而同時間，我哋睇到Apple喺教主喬布斯回歸之後，就重新崛起。」

據外媒剖析，有咁多Uber員工撐卡蘭尼克嘅原因，其實同佢作風有關，因為Uber喺全球都遇到唔少反對及威嚇，少啲Guts都唔掂！

余絲韻