期指觀瀾：短線難脫牛皮悶局

唔好嫌筆者長氣，日日話基金半年結前乜都可以發生，唔好咁快因A股入摩反高潮，判定後市死刑。昨日個市在美股微軟下開低，大戶挾高中國人壽（02628）及騰訊（00700）個別重磅股，期指開出後，由低位挾超過300點，若非午後個別中資股因查數消息拖累，好友已經飽到着唔到褲。

恒指最終跌20點收25,674點，國指升9點報10,402點，主板成交780億元，期指日市收25,673點，除息因素消失，低水幅度回到1點水平，國期收10,355點低水47點，成交分別有11.4萬張及10萬張。

日線圖上，恒指昨高位25,867點，一度升穿周二低位25,833點，重返10日及20日線25,779點及25,802點，最後大部分升幅化為烏有，回到平均線以下。不過，一如之前提出，恒指平均線呈現平順橫行狀態，跌穿甚至是10日穿20日的死亡交叉，威力大減，遠的不提，君可見三月底、四月初同樣試過同樣的悶局，最後堅持做淡的，在及後的升浪中一敗塗地。