A股入摩反高潮，隔晚美股偏軟，以為淡友趁勢踩多腳，殊不知唔及六月基金半年結前無形之手威力大。恒指又再坐咗轉過山車，低開挾升再倒跌，埋單僅跌20點收報25,674點，似乎未有意思想走出25,500至26,000點的上落市範圍。
A股入摩，近排222隻準指數成分A股特別精神。一如先前估計，重磅的內銀、內險股不乏追落後的捧場客。儘管A股落實進入MSCI指數是明年中的事，假設並非被動式基金，如果你是芬佬，會唔會真係等指數生效果日先追？答案係肯定唔會，而且又要驚資金流入限制一年內未取消，何不直接買相比A股便宜的H股。
好似昨日一度抽升3.8%的中國人壽（02628），A股（601628.SH）做緊27.46元人仔，香港H股只係24.25元，計落A貴過H差不多三成，比你揀會點揀？大市值、比A股折讓，低估值的股票，短期可續秤高一線。
昨日早市低開後，午市前一度倒升173點，挾死一心以為指數穿位的口淡淡之士。午後A股腳軟，港股縮番轉頭，多得內地傳中銀監要求銀行查數累事，成個市由熱轉冷，涉事的萬達（002739.SZ）在內地股債齊插，香港的復星孖寶──復星國際（00656）及復星醫藥（02196）隊低5.7%及5.9%收市。
近排個市，押中爆升股難比登天，反而被狙擊機構相中，甚至突傳不利消息的情況好似愈來愈常見。通街地雷之下，得一注本錢的散字派，真係要打醒十二分精神。
早兩日提過避一避批完股的呷哺呷哺（00520），昨見一個月低穿埋50日線，今日想寫寫另一隻一直十分喜愛的餐飲股大快活（00052）。三月底年度成績表，收入升6.3%，純利增2.2%至2.053億元，計及前年出售物業的一次收益，核心溢利升8.6%，成立45周年關係，末期息0.58元額外派0.5元特別股息，連同中期息全年派1.42元。
公司業績中規中矩，仲有特別股息，不過股價偷步行先，昨日業績見街後，反而跌番3.6%。歸根究柢是估值與期望存有落差，幾年前大快活毛利率進入改善周期（一三年13.6%），PE不過10.7至12.7倍，依家已經20.6倍，投資者對業績自然要求多多。
古勝