絲絲講場：5招自救保信貸清白

四成港人被盜用身份

邊有咁易中招？被人盜用資料情況都算普遍，信貸資料機構環聯今年四月向1,008位成年人進行網上調查，發現每五個香港人就有兩個曾被人盜用身份。

乜咁都得嘅咩？！嗱雖然唔少金融機構幫你搞貸款或者信用卡時，都會做客戶盡職審查（KYC）確認你身份背景，但環聯香港個人客戶業務總監羅瑞話，世上無百分之百嘅保安，騙徒透過唔同手段盜取你嘅私人資料，「幫」你網上申請信用卡，甚至借錢。

羅瑞仲話，有唔少人要到自己申請按揭或者信用卡被拒嗰陣，先發覺原來私人資料被盜用，自己個信貸評級被人搞「花」咗，結果令自己嘅置業大計被延誤。

唔想被人盜用身份？羅瑞教以下5招拆解：

1）不同網上帳戶要用不同嘅密碼，而且密碼要經常換

2）唔好貪方便用公眾Wifi讀取敏感資料

3）接近啲近場通訊（NFC）儀器時，要保持警覺

4）網上提供個人資料時，要檢查頁面嘅URL開首係https而非http，仲要確定有鎖頭標誌顯示為加密網站

5）使用信貸評分公司嘅提示服務，監察個人信貸有冇異常

余絲韻