Market Insight：瑞聲淡友似靜極思動

美國加息0.25厘，早為華爾街首肯之範圍，但近日美國經濟數據唔係特別強，五月核心通脹創逾兩年低，得1.7%，倫媽叫大家唔好太過擔心短期經濟，仲信誓旦旦話要縮表，難怪個市反應咁大。

大戶們選擇用腳投票

睇美匯指數一度隊到落96.31，見去年大選後新低，十年期美債息返回2.1厘，同三月高位2.61厘愈走愈遠。聯儲局話經濟強到足以啟動縮表，惟真金白銀賭大錢的匯市及債市選擇用腳投票，話畀倫媽聽美國經濟底子仲未夠資格，年底前加多一次息機會率僅僅三分之一多啲啲。

恒指連續三日橫行後，昨日淡友趁勢打開缺口，對息口最敏感的地產股調整外，中國人壽（02628）及吉利汽車（00175）同樣跌3.2%，並列藍籌跌幅之冠，騰訊（00700）跌1.5%收報273元，啱啱踩住20日線272.85元樓上。

科技新貴捱沽，啱啱禁售期結束的美圖公司（01357），股價創五個月低，跌6.5%報8.5元，其他如金山軟件（03888）跌1.4%，金蝶國際（00268）跌1.6%，IGG（00799）跌1.8%，昨日古勝推介的網龍（00777）獨強，day high收21.85元，升2.8%。

利標等跌定不妨諗諗

利標品牌（00787）出業績後，昨股價最多隊三成，落到0.79元，埋單跌21%報0.9元。若以為股價反映業績啲乜？實際去年公司賺9,000萬美元，勁升九成，昨日一跌將五、六月以來升幅一鋪清袋，11倍PE唔到，跌定之後又睇睇有冇撈底機會。

復牌後來個敗者復活，似要挾爆狙擊機構姿態的瑞聲科技（02018），由116.5元歷史高位插到落80元邊，近幾日股價在95至97元之間浮沉，啱啱反彈一半。睇近幾日沽空成交，淡友有靜極思動的手影，過去四個交易日，沽空佔成交比重平均升返上兩成一左近，有心人似有所圖。俗語話君子不立危牆下，復牌夠薑低位撈咗貨的先食胡為宜。

大市個勢落落哋，不過係咪要全線撤退，等待大冧檔的來臨，古勝仲係十五、十六。下周三A股第四度闖關博加入MSCI指數結果揭盅，過去幾年A股經歷政策牛、熔斷股災、滬港通及深港通的通車；MSCI方面，也做咗唔少構機投資者諮詢，今年先提出大幅降低入選股票數目，一個低指數權重入門的建議方案，以平衡阿爺恨到發燒，外資又見到A股怕怕之間的折衷方法。

A股入摩始終係好事

臨近重要關頭，近日內地有收緊IPO上市數目及融資規模，有托市的手影，睇落唔係十分好兆頭。

不過，在下仍然認為，今次A股成事機會應該高過五成，即0.5%的指數比例，對即時吸引外資流入，心理作用大於實際。點都好，加入指數對內地股市長遠發展意義重大。

古勝