恒指一如我於上月二十六日在本欄所公布的預測，於26,100點的巨大阻力下爭持，並且兩度上衝但是無功而還，最終於周一隨住科技股的急跌後回落，跌逾300點，並失守了10日線收市。
科技股的崩壞，主要是緣於納指於上周五的沽壓，致命原因有三：首先，是沽空機構香櫞（即是曾於中國恒大（03333）頭上動土，結果搞到捉晒蟲嗰間）唱淡晶片製造商Nvidia；第二，是高盛出報告指包括Facebook、Apple、Amazon、Microsoft、Google（FAAMG）升幅過大，波動率又低；第三，就是市傳Apple同高通傾唔掂數，新iPhone網速隨時慢過舊iPhone云云。
忽然間，市場有一萬個關於科技股的壞消息，都是由於股價來到某一個位，無咩人有意高追的水平，買盤減少了就特別容易起風浪。納指跌得不多，股王騰訊（00700）亦如是。但好奇怪的是，假如你去看媒體的報道，就肯定會嚇餐飽，唔知仲以為有股災添！
一日內有不下兩家傳媒來問我科技股的牛市是否完了？我心諗乜料？係咪未見過大場面？也許這就是散戶的心理，騰訊日日升，你問我幾時肯調整畀位你入？跌得嗰一蚊半蚊，卻又來問股份係咪已經見咗頂？船頭驚鬼船尾驚賊，成件事真係好搞笑。
近日市況調整，並不是瓣瓣都有得升。於是就有人發掘一些新奇、刺激又好玩的題材，就如中外對決呀、挾淡倉之類的相關股份。恒大的前科，有誰不想複製？作為股民的亦希望能夠捕捉到一個月升一倍的股份。
然而，如果係人都知道中國融創（01918）、廣汽集團（02238）同洛陽鉬業（03993）已被人盯上的話，又是不是隻隻都會排住隊嚟等你入場，然後升空就畀你賺？看官們自命懂得理解沽空的操作同數據至好博呀！
富昌金融研究部總監 譚朗蔚（作者為註冊持牌人士，持有騰訊）