Market Insight：騰訊長線揸得安心

炒股唔炒市仍穩陣

雖然科技股尚在整固，但昨日有濠賭股接力，再加上汽車股氣氛佳，帶動港股先跌後回升。誠如昨日上晝古勝喺東網Money18「即市推介」的評論所言，有三大理由短期市況難大淡，首先七月香港回歸二十周年紀念領導人訪港，如無意外，踏入七月香港樓價指數連續20周創新高，港股處今年高位，股、樓暢旺說明香港回歸「明天會更好」！

其次是，市場已充分反映美國聯儲局六月加息，預計耶倫對年內餘下時間加息步伐亦唔會有過「鷹」言論，好友反而少一瓣顧慮；第三點是，衍生工具市場尚未見明顯大淡倉部署，大戶推倒重來的誘因不大。如果以上三個理由成立，至少七月上旬前港股料可維持在高位反覆，可放心炒股唔炒市。

洛陽鉬業睇位短炒

異動股方面，不得不提提隻融創中國（01918），昨日略為高開後未肯回頭，一度抽高至15.66元，收報15.38元，升12%，據聞係與挾淡倉有關。

姑勿論如何，與近日爆升的長汽一樣，呢類活動進行的時間都係極為短線，散戶想沾點油水就要轉身夠快，千祈咪識上車唔識落車！

事實上，自從互聯互通開通後，部分中資股由北水坐了重倉，計埋大股東持股，市場流通股份大減，若然有一定的沽空數目，吸引大戶挾淡倉亦不足奇。好似融創就係一個好例子。

洛陽鉬業（03993）亦係互聯互通重倉股，且亦有不少淡倉，昨日股價升7.7%，收報2.78元，會唔會有挾倉活動？只有做事後孔明。

不過，論走勢，股價已突破多條平均線，回吐守得住2.7元，呢轉有機會反覆向上試叩3元大關。

汽車經銷股有鑊氣

論到板塊，汽車股仍然係市場焦點。上周五股價以大成交突破的長城汽車（02333），股價再創52周新高11.44元後現回吐，結果低收2.9%，報10.7元，成交達25.7億元。接力的有比亞迪（01211），飆升6%，東風（00489）以及廣汽（02238）分別升3.9%及2.9%。

另外，內地七月一日實施《汽車銷售管理辦法》，4S股亦見異動，其中和諧汽車（03836）升10%、正通（01728）升8%、中升（00881）升4%。

呢套新的汽車銷售管理辦法之所以有得炒，主要係此後除傳統的汽車授權經銷商之外，未來還將出現一些非授權經銷商以及汽車大賣場等售車群體，而汽車經銷商不再需要同時兼具新車銷售和售後服務功能，行業門檻變相下降，消費者多了選擇，而不用再經汽車供應商授權，意味進一步開放汽車經銷市場，中小型經銷商有更大的生存空間。

行業有實際利好消息支持，股價升得有道理，其中和諧汽車以一支大陽燭逼近250日線，短線3.7至3.8元乃今年以來的主要阻力所在，且看今浪能否以大成交突破。至於中升，股價創52周高位，收報13.72元，只是短線14元阻力非輕，今日除淨，睇吓股東收咗息會唔會入場增持。

古勝