絲絲講場：沈嘉偉兩兄弟狂加人工？
兄弟同心，其利斷金？今鋪唔係「斷」，係賺呀！作為本港潮服品牌嘅I.T（00999），舊年盤數算係幾省鏡，全年純利上升咗五成咁多，不過香港經營仍然流血不止。
絲絲一睇I.T嗰份最新年報，見到主席兼行政總裁沈嘉偉同埋佢個細佬兼公司執行董事沈健偉，兩位都齊齊有得加人工，加幅仲高到去1.2倍，高過盈利升幅一大截喎！
前年冇收花紅 今年補番
可能喺咁差嘅零售市道之下，整體業績都仲有得升，都已經算係交到差喇啩。沈嘉偉兩兄弟分別袋咗酌情花紅2,200萬同1,800萬元，加埋其他變化唔係好大嘅薪金、房屋津貼等福利之後，兩個人加加埋埋就袋走咗超過7,200萬元，佔咗整體董事會總薪酬嘅90%，聽落都好和味喎。
不過，講開又講，前年沈家兄弟因為業績差，就冇酌情花紅收，所以今年先會有咁大升幅啫。
事實上，佢哋兩兄弟身為I.T嘅主要股東，揸住足足61%股權，舊年收息都有成9,600幾萬元，所以全部嘢加埋總共袋走差唔多成1.7億咁多呀。嘩，呢個數目已經係公司舊年純利一半有多喇。
余絲韻