孖妹S檔案：半年升7% 美股癲夠未？
美股一支箭咁飆上去，道瓊斯指數今年升咗約7%，氣都好似唔使抖！孖妹班姊妹見到啲券商嘅買美股廣告，喺度話要緊貼潮流「崇吓美」，但侵侵如果唔生性，隨時推冧美股。加上上周五代表科技股嘅納指就單日跌咗1.8%，嚇到孖妹即刻面容失色。咁究竟買美股仲有冇肉食？
本地投資者多屬好友
郭：致富證券投資銷售部董事 郭家安（Thomas）
彩兒：好耐冇見喇，睇你春光滿面，作為華資行，港股表現好，你哋生意自然好，但美股掂，你哋又受唔受惠到？
郭：其實近一、兩年，都多咗香港人熟悉美股，提高咗香港股友對美股嘅接受程度，更加會令佢哋對部分美股發展有憧憬，會有入市意欲，好似最普遍嘅有facebook（美股編號：FB）、Tesla（TSLA）、阿里集團（BABA）等，普遍本地股友買嘅都係呢啲巨擘。
因為美股今年嘅領頭羊主要係科網股，係潮流大勢所趨，所以係股友愛股；相反，好似銀行股呀、資源股呀咁，尤其係銀行股，都少咗人炒，皆因大家都知道銀行監管嚴咗，盈利能力差咗，所以就幾一面倒炒科網股。
Kitty：醒目股友唔熟唔食？
郭：玩美股嘅股友有兩類，一類就係接觸開間公司嘅產品或業務，好似Tesla咁，買唔到架車都要買股票，因為睇好佢前景，見到佢都幾好用或者需求都高；facebook都見到佢啲廣告，喺用家層面都知發展好；第二類就係內地投資者嚟嘅，因為有唔少內地企業去美國上市，佢哋對呢啲中概股嘅認識就比香港股友為高，有時佢哋買嘅股票，我哋都未必識。
設期權 推佣金優惠
彩兒：食埋美股呢瓣，你哋今年花紅咪好正？
郭：整體客戶對美股嘅查詢比舊年多咗三、四成，包括透過電郵、電話查詢等，開戶都多咗超過五成，唔少人開戶都順便開埋美股戶口，所以今年係好咗，佢哋多數都係長揸大型股為主，若然係有新股上市先會炒即日或短線。股友對美股後市睇法都係偏好為主，喺美國總統特朗普上場後，投資者憧憬稅務寬減政策，唯一只係擔心有黑天鵝出現，好似特朗普被彈劾，或者上述政策失敗而令美股走勢逆轉，不過依家升緊就冇理由依家放。
現時致富美股交易冇做特別推廣優惠，網上交易單邊做緊0.15%收費，最低收費係18美元，遲啲有機會做佣金優惠，另外依家有做緊股票期權，未來會做多啲推廣，有槓桿玩法之下就似玩窩輪，特別啱大價股玩……我哋都考慮緊會唔會做埋美股嘅按倉同沽空。
標指下月恐回調一成
梁：上善資本財富管理總監 梁彥穎
彩兒：嘩！上星期五美國科網股咁跌法，我個小心臟都驚一驚，唔通又係科網股災？
梁：梗係啦，科網股升得咁急，依家咪高處不勝寒囉！而且都唔係隻隻科網股都咁堅o架，你叫得出名嗰啲咪穩陣啲囉，好多細科網股其實都未賺錢，而且好多產品都係得個講字。另外，你都知科技產品講求創新突破，否則啲人未必肯換機。依家有貨就揸住，冇貨就睇定啲，就算買，都唔好買太多。
美多個火頭未解決
梁：留意到標指一路都冇乜回過氣，去到六、七月期貨2,475點水平已去到盡，七月做認沽期權嘅人多咗好多，我覺得有指標性作用，皆因有唔少大基金想走大量藍籌貨，會先沽定期指、再買認沽期權做對沖，所以可能係沽貨先兆，預計七月標指最多調整一成。
Kitty：買美股郁啲就賺個名牌袋嘅光景仲持續到咩？
梁：如果想依家入市，離標指2,475點仲有些少水位，但只合適進取投資者玩，其實港股、美股好同步，冇乜分散風險嘅能力，只係有較多科技股選擇啫，我建議最多投放三成資金落去。
始終，依家特朗普做美國總統隨時爆出大頭佛，佢減稅方案又大機會通過唔到，美國政府債務危機又未解決，依家只係盲目推升股市，所以美股幾時大冧真係冇人知。
忠實炒家個股賺兩倍
吳：「美股隊長」 吳瑞麟
Kitty：你只炒美股，你都好崇洋喎！
吳：我○八年開始炒美股，當時港股美股齊齊炒，一開始學藝時巧遇金融海嘯，當時美股做借貨沽空易過港股，所以就由「沽」起家，到一二年起內地經濟增長放緩，我就脫離港股，齋玩美股。最初投資美股，我主要係以技術分析加基本因素分析嚟揀股，去到近三年，我就全面只用技術分析喇，有時連間公司係做乜嘅都唔知。
專揀創新高大型股
吳：唔用基本因素係有苦衷，美股近年升得最勁嘅係科技股或生物科技股，有時啲藥品講完自己都唔識，唔似金融股、消費股咁可以自己研究。我現時主力會發掘創歷史新高嘅大型股，呢啲股唔會有蟹貨，投資者唔會急住食胡，甚至係搶雞胡，美國基金公司都會揸重倉，好似亞馬遜（AMZN）、facebook、Tesla咁，我特別鍾意美股市場深度夠，又夠安全，冇咁多造假帳問題，股份流通量又充足。
彩兒：啲股友成日話買美股係隔山打牛，乜佢真係值得你撇甩港股咩？
吳：我近兩年嘅代表作係喺33美元買入晶片股NVIDIA（NVDA），後來就喺約100美元沽出股份，後來股份再創新高，首仗賺約兩倍。我喺120美元又入番市。該股上周五畀沽空機構Citron唱淡而一度大跌10%，我雖然喺低位放售，仍累賺咗約10%。我今年內嘅整體美股投資回報就約有15%。
美股有眾多增長能力驚人嘅科技股上市，唔似香港只得騰訊控股（00700），最少買一股就可入場，門檻低，我用外國網上證券行每次交易費只係1美元！現時美股係「有升幅冇波幅」，就算高追都唔畏高，近兩、三個月升盤路係「牛熊共舞」，資金仍集中追逐科技股，走勢緩步上升；傳統板塊能源、資源同傳統零售走勢就失色。
Kitty：究竟你有乜獨門炒技？
吳：我一向都係中線投資，唔會短炒，每晚九點半開始Set定晒啲盤就唔會郁佢！我恒常嘅美股組合係由20隻股份組成，只係會炒大型股，呢部分投資會佔我三分之一身家，現時係滿倉兼有少少孖展期權，我每周都會參考StockCharts Technical Rank（SCTR）去調整組合，主力只買排名頭20位嘅股份。若股份由近四年高位回調15%，我就會沽出股份，而且一定會遵守紀律。
彩兒、Kitty
若有料報畀彩兒同Kitty或有嘢問，可電郵money.biz@on.cc