Market Insight：地產股逢低唔怕買

金融世界一日都嫌長，居然有分析員夠膽開咁長的期票，真係信佢沽樓轉租揩咗嘢，十年後你都唔知去邊度搵人找晦氣。

內地人撐起港樓市

再者，香港樓市早就唔係700萬人市場，內地客掃貨，三成辣稅照畀眼都唔眨的新聞大家睇唔少。有位樓市長勝將軍同古勝講過，依家香港樓市同以往唔同，霧霾與各式各樣污染問題，唔少有銀內地人都以香港為移居目標，淨係廣東省人口1%的有銀之士，落嚟香港買番層樓，都講緊有110萬的需求，足以吸乾香港私人物業總存量的九成六。尚未計其他城市的有銀之士，所謂的新供應逐步增加，根本自欺欺人，如果唔阻外來購買力，根本起多多都唔夠。

至於在下睇好的地產股，更加唔使理報告。自○七年開始，本地地產股早已唔跟樓價走，香港發展商世代交替，由上一代創業到依家守業階段，遊戲玩法不同，由賣樓主導轉為更大筆收入來自收租，以平均3厘息計，即使樓價跌，未必對派息有太大影響，逢跌就買仲係無個錯字。

英國脫歐增添變數

四月時，英國首相文翠珊突然宣布提前大選，不少政論家拍案叫絕，估計在超過兩成支持率優勢下，百利而無一害。明顯地，大家忽視近年國際政局唔冷唔爆現象，結果保守黨慘遭滑鐵盧，下議院過半數議席的優勢都失埋，應晒偷雞不成蝕把米呢句話。

豪賭一鋪輸清光，黨魁個位文翠珊坐得幾耐都好難講，首相之位岌岌可危，未來幾年邊個領導英國同歐盟進行分手談判？最終又會否堅持硬脫路線，抑或認低威發展到軟脫的立場，兩個月之間，英國前途充滿變數。

匯商一直坐定粒六，懶理保守黨在民調支持度不斷插水，或許引發不確定性，英鎊兌美元在1.28至1.3算之間橫行個幾月，到選舉結果出嚟先識驚，上周五插到落1.2640，三月開始的反彈睇怕係時候告一段落。

「網股雙雄」爭一哥寶座

上周五港股雖跌32點收報26,030點，但全星期計有106點進帳，連升五個星期。上周五大市主板成交1,169億元，是三月中以來最勁，股王騰訊（00700）一隻就交出193.2億元成交。

近期中國科網股一哥寶座爭奪戰，進入白熱化。騰訊年初至今累積升四成六，上周五突破280元創歷史新高，市值一度達到2.68萬億港元，相當於3,435億美元。咁都未算勁，在花旗掛牌的阿里巴巴，上周投資者會議上豪言，預測明年營收增幅近五成，遠超街外估計，即時掀起屠殺淡友一幕，急升一成八高見148.29美元歷史新高，以3,750億美元市值再超越騰訊成為股王。

本周聯儲局一連兩日議息，加就加硬，只係睇會後主席耶倫會否對未來息口以至縮表多說兩句。要小心近排美股表面風平浪靜，但蘋果公司為首的美國科技股喺上周五無大利淡消息下紛紛插水，拖累納指重挫1.8%，環球股市都熱炒新經濟概念之際，香港的騰訊單天保至尊頂住指數，一旦跟大隊齊齊回頭，對指數的衝擊不容小覷。

古勝