Market Insight：A股次季要發圍唔易
喺超級星期四前夕，投資者以觀望為主，恒指喺26,000點關爭持，昨收報25,974點，跌22點。市場焦點都落在沽空機構相關話題。昨日下晝兩點渾水開估，原來主角係敏華（01999），公布後敏華股價即大插水至中途停牌，反而另外兩隻盛傳可能是目標的通達集團（00698）及中國水務（00855）就抹一額汗，股價隨即反彈。
A股表現亦精神番啲，滬綜指昨日升逾1%，收報3,140點，係唔係炒定A股入摩，不得而知。只是呢一個調整浪，滬綜指總算得住3,000點心理關口，短線反彈叩3,200點不足奇。但古勝始終認為，次季內地經濟增長又再放緩，A股底子都未係好穩陣，除非上大人鬆手，否則不宜對A股表現有過高期望。
藍籌股瑞聲科技（02018）公開澄清沽空機構指控後復牌，股價昨日最多飆18.7%，收報92.55元，升13.6%，總算暫時穩住了場面。不過，另邊廂「葛咸城」仍未肯罷休，話會再就瑞聲發沽空報告，又強調瑞聲始終未解釋到為何一四年以來公司毛利率比蘋果公司還要高！
唔少投行都發表報告撐瑞聲，目標價睇過百一蚊的都有。老實講，班投行口氣咁一致，反而有啲古怪。另一點奇怪的是，蘋果公司至今未就有關主要零件供應商的不利傳言表過態。客觀事實是，瑞聲供應不少蘋果公司智能手機零件，一旦出問題，可能會影響下半年的產品銷售；其次是，瑞聲已成藍籌，不少指數基金坐貨，有起事上嚟，足以令今年上半年的基金成績泡湯，正所謂「同坐一條船」，只要公司管理層肯頂住，照計班芬佬都好樂意一同撐住。
新世界攻守兼備
總括而言，在下就寧願坐喺度剝花生，亦唔願意沾手是非股。好似敏華上周五已傳出成為渾水沽空對象，而事實該股沽空股數又明顯增加，小股東想逃生其實有充足時間，唔肯走，依家停埋牌怨得邊個？
講完一番「空」話，又睇番隻新世界發展（00017），公司宣布向旗下新世界百貨（00825）提私有化建議，作價每股2元。受消息刺激，新世界百貨昨日上晝股價高開見1.93元，即係一步到位，收報1.9元，升42.8%，成交1.59億元；新世界發展就平收，報10.78元。
其實，在年輕一代的家族成員領軍下，近年新世界擬透過重組以彰顯資產價值之意甚明顯，對小股東而言當然係好事，故今次擬將新世界百貨私有化亦不太意外。論作價，新世界百貨小股東亦應樂意接受。隨着尖沙咀新世界中心重建快完成，以新世界現價往績市盈率11倍，息率4厘及市帳率0.56倍而言，可謂攻守兼備，長線大可繼續持有。
古勝