絲絲講場：巴菲特蓋茨床照曝光

股神巴菲特同微軟創辦人蓋茨「老友鬼鬼」大家都知，例如一齊發起全球富豪將身家捐一半做慈善，一齊打Golf、打橋牌等等。而股神每年在奧馬哈舉行的股東會，蓋茨必然都會撐場，又飲又食。但佢哋兩位當今億萬富豪，據知還有一樣共同興趣，可能好多朋友都未必知道喎！

最近蓋茨就喺佢個Blog度貼咗一段佢同股神巴菲特一齊行傢俬店嘅片段，仲一齊試床褥添。在影片中，巴菲特和蓋茨瞓喺床褥上面，仲一臉享受！

估唔到兩個「大忙人」都會一齊行傢俬店，股神喺片段中仲同蓋茨講﹕「其實我想做一個床褥測試員，每日只要瞓喺度試床褥就得，但可惜我實現唔到呢個願望。」佢仲話，如果做到呢份工，就唔使成日對住電腦。

雖然股神未能願望成真，但佢同蓋茨可以一齊試床褥，一享床褥測試員的滋味。蓋茨仲瞓喺床上面，笑住同股神講：「我覺得呢張床褥仲舒服過我屋企嗰張。」蓋茨咁講，唔知有冇諗過換咗屋企張床褥呢？

果然，朋友再忙都好，點都係要周不時歡聚一吓嘅！不過聚到床上面都幾新穎。

余絲韻