孖妹S檔案：當頭起 追落後 邊瓣贏？

當頭起 科技消費股夠穩陣

潘：大成國際資產管理投資研究部基金經理 潘國輝（Herman）

彩兒：上次搵你飲茶嗰陣，恒指喺24,000點，你實牙實齒話大市有力再上，睇得咁牛，咁都畀你睇中，抵你咁牙擦！

潘：我邊有牙擦，哈哈！上次話恒指要企穩26,000點唔係咁難，到依家睇法都冇變，甚至係上到更高Level都可達到，我睇好港股表現係有幾個因素，例如資金流向、估值、盈利方面，皆因盈利係觸底回升緊，恒指同國企成分股盈利都係比舊年好，錄得按年增長，舊年按年睇仲係下跌緊，所以對整體大市有幫助。如果以二○一七年預測市盈率計，26,000點，都只係13倍，以過去十幾年平均估值計都係偏低，若然上到14倍，都係上到27,000至28,000點水平，我覺得如無意外，下半年有機會達到。

唔好聽「五窮六絕」呢啲傳統智慧，喺統計學上冇譜，依家恒指連升5個月，累升唔太多，只係約15%，同新興市場嘅升幅相若，亦同其他亞洲股市例如南韓、日本、台灣差唔多，但畢竟已升5個月，去到現時水位，一旦六月份整固、回調少少，係合理嘅。睇吓用乜回吐藉口啦，今個月係有3個重要事件，六月八日係英國大選、十三至十四日係聯儲局議息，二十日就要留意A股入唔入到MSCI新興市場指數，以呢三件事做藉口都好合理，亦唔使太擔心，若大市回調至25,000點或以下水平都係買貨良機，我要重申，我睇今年個市係比較好，現時水平唔會係終點囉。我仲睇到，喺資金流向方面係好咗好多，每日700億至800億元成交不時都有，依家有深港通同滬港通，加咗好多Players，外資亦增持新興市場比重，港股受惠，相信即使有調整都唔會多。

Kitty：呢一輪升市，科網股、科技股飆得好勁，當中有部分試過有調整，其實花係咪真係可以百日紅？

潘：我無改變過睇法，近幾年我都Keep住睇好科技股同埋消費股，下半年我都會繼續，科技板塊包括騰訊控股（00700）都升咗好多個月，其實六月份回吐好正常，唔好錯過買貨機會，皆因見到大市增長主要來源係呢啲板塊，香港、美國都係，呢類股份每年每季都交出好成績，銷售同盈利增長都掂。消費板塊亦係可以長線吸納，因為主要受惠於內地中產消費升級，近排都見到唔同類型嘅消費股跑出，例如汽車，反映中產消費；香港、美國上市嘅內地教育股都唔錯，呢兩個板塊可以繼續買，好過亂追落後股，如內銀同石油股。

恒指今年突破多個關口	潘國輝睇好板塊	大成潘國輝稱，消費板塊可以長線吸納。

車股揀嚟玩 吼吉汽

潘：因應上年有稅務優惠，有高基數效應，但要買車嘅人就始終會買，不過汽車股就唔會全部都睇好，要做多少少功課，揀可以受惠商品周期同品牌嘅公司，亦要睇番銷售情況，如果係汽車零售股，我會睇好賣寶馬嘅公司，因為寶馬未來一至三年，會有今年嘅5系同未來推出嘅3系新款，所以利好盈利；國產車如果係做SUV車型嘅都掂；汽車售後服務股亦不俗。

彩兒：轉型中嘅吉利汽車（00175）最近係唔少基金同股友嘅寵兒，佢出嘅SUV近一、兩年都好Hit，帶動銷量不斷創新高，佢母公司揸住富豪，吉汽同富豪合作高端「Lynk & Co」首款SUV第四季就會應市，市場對佢期望好高；吉汽藉住買馬來西亞寶騰汽車車廠，仲有機會打入東南亞市場添。

美上市補習股看俏

潘：另外，教育股之中，我就最睇好美國上市嘅內地補習股，包括好未來（美股編號：TAL），優勢係，內地補習市場嘅市佔率好分散，兩間龍頭企業嘅市佔率都唔夠10%，未來增長會源自於喺內地城市繼續收生，搶佔小行業參與者嘅份額，行業增速喺未來幾年見唔到放緩迹象。

Kitty：你上面嗰啲閒閒哋都揸兩、三年喎，我冇你咁長情囉，哈哈！

潘：我嘅短線會係指Within一年，我管理嘅大成海外中國概念基金Top 10都有中銀香港（02388）同內險股嘅……依家大環境講緊加息，中銀香港就較為受惠息差擴闊，又有行業併購概念，有機會收購海外資產，增速應該係香港銀行股中較快；內險股呢，就受惠A股走勢平穩、中國國債債息升，對佢嘅投資收益有幫助，可以提升估值，首選係大型啲嘅。

追落後 內銀值博 主攻四大

祝：翱騰投資管理（香港）基金經理 祝振駒

Kitty：恒指逼近26,000點關，你依家會係好友定淡友呢？

祝：我不嬲都唔做指數預測，不過依家大價股升咗咁多，值博啲嘅會係二、三線細價啲嘅股份……其實近幾個月板塊都係一浸浸咁輪流炒，主力係啲科技股，但自從瑞聲科技（02018）畀沽空機構狙擊後，個別科網股同科技股就回番啲，騰訊係例外，我自己覺得無論從盈利增長同前景去睇，兩個板塊今年都仲係會向好，因為蘋果公司iPhone 8今年對成個產業鏈嘅帶動係好大，美國嘅半導體公司業績都非常好，不斷創新高或接近高位，所以回調得較深、基本面不變嘅相關股值得買番。

祝振駒睇好板塊

翱騰祝振駒稱，中長線仍看好科網、科技股。

內房太瘋狂 不宜追

祝：中長線我都仲係睇好科網、科技股，因有業績支撐，瑞聲科技我覺得佢唔係講到造假咁誇嘅，一旦復牌後再跌一跌，可以撈；早排批過股嘅通達集團（00698）現價可留意，因有股東不滿佢批舊股，所以沽出股份，搞到股價跌咗唔少，今年可受惠產業牛市。

彩兒：想追落後嘅話，有乜心水，又有乜衰嘢係要閃避？

祝：追落後就好明顯見到內房追完、內銀又追啦，不過內房近期飆得太癲喇，想追嘅話，內銀市值係最大，值博率會高啲，其實依家隻隻內銀都差唔多，如果夠子彈嘅話，可以四大再加多隻二線嘅，但就唔好買到去三、四線、好地區性嗰啲，皆因成交量比較低，個市一逆轉就慘，唔夠錢就買隻中型啦。嗱，股息率唔係內銀股價升嘅原因，市場始終怕內銀壞帳問題，真係齋追落後咋，基本面見唔到乜改善，短線氣氛好，可短炒一轉。

若有料報畀彩兒同Kitty或有嘢問，可電郵money.biz@on.cc

彩兒、Kitty