上周五美國三大指數向上，道指盤中見過21,225點的歷史高位，最終升62點報21,206點，港股夜期微升收市，已預示今日港股開高的機會甚高。股壇老前輩話，凡係牛市三期，如癡如醉的投資者往往無視一切不利因素，近幾個月美國愈升愈有，大有股壇老兵所指，「上帝要你亡，必先讓你瘋狂」的氣氛。
有人會問，何出此言？舊年美國大選「侵侵」勝出，佢經常信口開河，華爾街在新官上任，蜜月期未過仲信到十足，都仲可以話一廂情願，像墨西哥起圍牆般的荒誕承諾無謂再提，股市充滿期望的稅改，以至近期曝光的財政預算，空有想法卻難以妥協各方利益，成份完完整整通過到國會機會近乎零，股市偏偏當自己時運高，睇唔到。
見微知著，近排「侵侵」一意孤行退出《巴黎協定》，遭西方盟友群起譴責話出爾反爾，美國國內也有三十個州表示拒絕放棄。民望插水的「侵侵」，國內外都變成過街老鼠一樣，可以預期，跛腳鴨政府未來施政必然舉步維艱。近日美金回軟，美債息回升，已見避險資金的部署，唯獨美股唔信邪仲創新高。
古勝無預知未來水晶球，無辦法估幾時出事，有隔山買牛習慣的股民，真係唔好咁勇成個身瞓晒落去。
英國大選前夕，倫敦再爆恐怖襲擊，由首相文翠珊提出解散國會提前大選計，短短兩個月內保守黨由坐定粒六贏緊半條街，到最新形勢同工黨支持率差距收窄到不足3個百分點。選前的恐襲，影響結果事小，如果最終未能一如預期，在大選中的國會議席上取得甜頭，若要組聯合政府，英國在脫歐談判將變得更為被動，變數又多幾分。
踏入六月，市場焦點係A股能否如願入摩，加入MSCI指數一洗頹風。近半年內地收緊銀行監管，處理影子銀行同時加強去槓桿力度，A股表現一池死水，3,300點不破，四月初反而掉頭輾轉退守到3,000至3,100點之間掙扎。以為A股唔得，港股無運行？結果恒指卻亦步亦趨向着二十三個月高位推進。
今次MSCI將A股納入的規模瘦身，成功入摩機會應該高於五成，二十一號前的股市氣氛應該唔錯，尤其部分估值低的重磅中資金融類股份，六絕月個市唔好睇得太淡。
港股慢火煎魚，上周五再升114點收報25,924點，兩萬六大關僅一步之遙。股王騰訊（00700）抖氣，輪到內房、地產股及獨市生意的港交所（00388）輪流發力。
港交所一係唔發威，上周五一升就升4.1%，一口氣攻破悶咗近四個月在187至202元的上落區，直指過去兩年的兩次重要阻力211至212元水平，能否成功攻頂，真係要睇大市可唔可以在現在七、八百億元日均成交水平下，進一步出現突破。
近排內地一線城市樓價開始回落，適逢內房股炒得火紅火綠，唔通醒目錢開始炒調控下半年鳴金收兵？中國恒大（03333）炒到上15.78元歷史高位後，以旗形整固，會爆多浸定回落，日內應有答案。相之下，古勝認為汽車股反而估值貼地啲。
廣汽集團（02238）啱啱出咗五月份銷量數據，按年升22.2%至16.55萬輛。論估值，廣汽只及吉利汽車（00175）一半，後者五月至今股價累升35%，廣汽只有7.3%進帳，大大落後，股價喺12.2至13元平台橫行多時，遲早輪到佢爆上，短期要睇實。
古勝