Market Insight:中興續向高位推進

港股在高位反覆,到底係咪到浪頂,古勝都冇水晶球,但睇落恒指先回試25,000點關承接再試衝高的話,基礎會比較紮實。事實上,呢浪權重股如騰訊(00700)已累積可觀升幅,收息股如中電(00002)、煤氣(00003)、港鐵(00066)及領展(00823)等都不斷破頂,但中資金融股股價回升至一五年A股大時代前後水平,將會遇上一個頗大的蟹貨區,後市再上要靠哪個板塊發力,倒是疑問,故見好識收方是上策。

呢期一個電腦病毒就搞到世界大亂,當人類生活電子化元素愈來愈多,電腦病毒的散播確係一大風險,也許亦因為咁,人類還有存在價值。講番個股,雖然呢期電腦病毒話題洗版,但未見軟件股有太突出的表現,如金山軟件(03888)上到22元水平須先行整固,寧可等待以大成交突破23元先至考慮追貨。

此外,電訊設備股中興通訊(00763)昨日股價亦見異動,創52周新高15.5元,收報15.42元,升4.3%。睇圖走勢唔錯,仍處自去年七月以來的升軌之上。四月下旬受制於15.2元後現回吐,但在14.4元水平找到承接,最近兩日連現兩支陽燭,昨日股價突破有成交配合,升勢有餘未盡。

中興A股(000063.SZ)亦急升8.6%,一定程度亦帶動H股表現。適逢今日係「世界電訊日」,若早段見中興A股繼續挾高,呢轉H股有勢踢穿16元關,上試16.3元阻力位,回吐支持可參考昨日平均成交價15.1元。

和諧汽車暫不宜沾手

一五年A股大時代期間,和諧汽車(03836)一度瘋炒,之後股價累跌近八成,令到唔少芬佬都中伏。睇番和諧股價在本月上旬創52周新低2.44元後,股價連日反彈,昨日高位見3.18元,主要係公司主席、首席財務官等高管均有增持行動,雖然增持數量不致太多,但消息唔多唔少可以提振吓股價表現。

轉型進度成發展關鍵

不過,舊年和諧仲蝕緊3.7億元人仔,到底網絡布局轉型進度如何,仍須觀察,而有關新能源汽車項目的發展,亦為關鍵。在這些圖畫清晰化前,純靠增持消息,不宜過分亢奮。

昨日和諧汽車收報3.16元,升9.72%,成交5,186萬元,睇走勢3.2元水平阻力非輕,若冇平貨在手,仲係觀望為妙。

電企重組抱短炒心態

騰訊季績前有回吐壓力,強勢股高位遇阻,魚缸炒作焦點又轉攻略落後板塊,中資電力股再度發力,被大行指將會是五大電企重組合併最大得益者的大唐發電(00991),昨日股價飆過上2.91元,收報2.88元,升8.2%,成交達3.46億元。

同系大唐新能源(01798)亦升3.9%,收報0.79元。除咗行業合併概念之外,剛宣布季度調整的MSCI A股指數,獲納入的A+H成分股包括大唐發電,亦為利好因素。

其他如華能國際電力(00902)、華電國際(01071)、華潤電力(00836)、中國電力(02380)升1至5%不等。近月獲中國再保險(集團)力吸的華電福新(00816),股價亦升4.5%,收報1.85元。

行業經營挑戰重重

老實講,對於行業合併,古勝都係當炒作為主,實際上要實現五大重組合併,睇怕冇三、五年都做唔到,一來各有各自的山頭,利益如何擺平,誰併誰,都是大問題。

再睇國企改革,今年以來都缺乏重大的實際行動,故處理電企合併等相關消息,都係抱短炒心態,畢竟在L形經濟下,電力需求增長低,電企經營環境挑戰大,暫未見得中長線有好大的吸引力。

古勝