絲絲講場：百麗錯失轉型 盛總攬晒上身
「鞋王」百麗國際（01880）上市十年，由藍籌股走到依家打算私有化，CEO盛百椒內疚「公司未有及時轉型，責任在我！」
盛總尋日自責話，當初老闆（鄧耀）放手將公司全權交託畀佢搞，但當面臨經營環境、顧客消費模式改變時，佢因各種原因無及時作出正確判斷，結果令公司空有優秀團隊，遲遲未能開Turbo轉型，錯失晒發展時機。
留多兩三年幫手過渡
盛總諗起十年前忙緊上市路演，對於當年招股凍資額高達四千幾億元，佢呢一刻仍然覺得歷歷在目，仲話「當年我們賣鞋的，凍結資金竟然超過了中國工商銀行，不過當時幸好沒有得意忘形、大講成功之道，否則今日就無地自容了！」
盛總今年已65歲，佢話今次私有化係為咗公司，亦係為自己搵出路，完成私有化後都唔會咁快講「拜拜」，計劃再留低兩至三年協助公司過渡。
佢又慨嘆喺百麗服務咗廿五年，「人生做了一件事，不算成功亦應該滿足。」佢仲講笑話，媽媽唔早唔遲、偏要喺五一勞動節生佢，勞動命加上責任感，令佢每次公布業績都好難受，覺得無法向大家交代咁話。
慨嘆自己唔識開電腦
見盛總認自己「到目前仍然不會開電腦、連微信也沒有」，絲絲仲慨嘆。
余絲韻