Market Insight：基金股選擇唔使多

搞到今時今日呢個田地，同港股日漸A股化，上市公司質素良莠不齊不無關係。話八字頭純啤殼的炒股，人哋私人派對你要踩場入去玩，輸死心甘命抵衰個貪字。不過，好似漢能薄膜發電（00566）同輝山乳業（06863）呢啲巨型基金股，都可以化學到一夜之間沒頂的事例，證明港股為咗衝集資額，做多啲生意，在監管上市公司質素方面，表現實在差強人意。

當通街老千股的印象逐漸成形，整個港股的估值必然受到影響，結果資金來來去去咬住唔死得人嗰二、三十隻超級龍頭股，其他股份只係雞仔注玩吓，長期無乜成交兼估值愈來愈脫節。

有個幫本地家族管錢，主攻港股的老友，十幾年前開市緊張萬分，近年得閒到開緊市可以用電話打牙骹。近排有機會坐低傾，知道老友成功在於少做少錯，面對通街陷阱，佢愈玩愈簡單，主打一啲摸得到睇得見的本地公司，好似中電（00002）、領展（00823）、港鐵（00066）及友邦保險（01299）之類，唔死得人仲成績比以往更穩定，真係值得大家參考。

一帶一路似難掀炒風

上周五臨近尾市，港股拗腰由跌轉升，恒指只進帳30點唔算多，但連升五日個紀錄得來不易，成個星期計累升679點或2.7%。內地「一帶一路」峰會舉行前夕，相關股份熱度一般，大孖沙情願衝入去股王騰訊（00700）度癲好過。

雖然近排港股突破兩萬五點關口，好多財演分析員講到個市氣勢如虹。惟實際上，一五年「港股大時代」的反彈浪頂，都見過28,588點，以恒指現價25,156點比較，實在半點也談不上是強勢突破。

美股周五輕微低收，但夜期及新加坡黑期都預示，恒指在周五晚收市後，再有過百點進帳。剛過去的周末，中國首次舉辦「一帶一路」國際高峰論壇，此前相關概念股無乜鑊氣，似乎炒鬼對每年間歇性炒作的故事興趣，已經今時唔同往日。

北韓挑釁易玩出火

「侵侵」啱啱放風，願意同肥仔金坐低傾，周末期間冷不防北韓又玩導彈試射，肥金來一招敵退我進，趁機在朝鮮半島亂局撈政治籌碼，兵荒馬亂大家只能自求多福，冀望美朝唔好擦槍出火搞到一發不可收拾。

樓市新招影響有限

香港樓市認真誇張，三、四百呎新盤，閒閒地都過千萬元，開價堅離地的連鎖反應，係連二手盤叫價日漸心紅。查實近年多咗內地發展商盲搶地，麵粉貴過麵包經已習以為常。基於由投地到預售至少要兩、三年時間，形成業主以及準買家對未來樓價不切實際的預期。

資金明知貴都湧向新盤，同發展商提供高成數一按，兼有五花八門的折扣、補貼，令到畀唔到五成首期的準買家一樣可以上到車有關。

上周五金管局又出招，今次唔向買家落手，轉向上游施壓，限制發展商建築融資比例上限。牌面睇，係要堵塞中資借到盡南下天價搶地，但你有張良計，我有過牆梯。

中資要籌旗方法多

事實上，中資近年在港買地，融資門路五花八門，發債、買殼、圍內銀團貸款，幾廿種方法，根本唔一定要同本地銀行伸手。

至於幾間本地發展商，經歷九七年金融風暴至今，槓桿愈玩愈縮，資產負債表保守程度簡直匪夷所思，影響微乎其微，今次出招似做樣板戲，擺姿態多於一切。如果本地地產股就消息出現震盪，又係一次入市良機。

古勝