Market Insight：內銀板塊暫勿沾手

金融市場有時唔去到結局，都估唔到劇情點發展，好似舊年「侵侵」上場，個個以為勢將耶倫落鑊，白宮百日生涯過去，「侵侵」的選舉承諾走數快過打針。中國無操控匯率、美元過強有損經濟、支持低息環境，兼且亦無請倫媽食無情雞的意思。

依家睇番，倫媽要多謝「侵侵」至真，好似聯儲局海嘯後無耐已講緊利率正常化，拖到一五年先加到一次咁大把。若非「侵侵」選前吹到天花龍鳳，對振興經濟幾近無所不能，華爾街又信佢有能力令美國經濟再膨脹，聯儲局又點可以咁輕易在白宮易主不足百日之間兩次加息！

講番港股，近排A股績弱，國指亦然，昨率先跌穿10日線，拜幾隻重磅內銀弱過藥煲所賜。近期中央去槓桿的工作可謂迅雷不及掩耳，上月過百單發債計劃「被取消」，中銀監易帥後，高調收緊對銀行監管，似要解決長年透過影子銀行將資產轉到表外的老問題。

正如光大銀行（06818）擬溢價48%配股集資350億以補充資本，大股東包起當然問題不大，其他內銀底裏都係阿爺私人派對，最後邊個埋單已呼之欲出。但對於小股東點安排，「百業之母」水緊對信貸市場有咩影響？由四大行腳軟，到二三線內銀低處未算低的走勢，似乎向着一個唔太樂觀方向行緊，內銀捧場客暫時都係忍一忍手為妙。

衝浪要做定兩手準備

聯儲局今次議息，並無着墨於縮表的討論。回顧聯儲局自金融海嘯爆發，大水猛灌浮起瀕臨崩潰的經濟，資產負債表由不足9,000億美元，三級跳去到依家4.47萬億美元的天文數字，縮表意味貨幣緊縮的開始。

過去幾年游資氾濫，引發股市及環球樓市泡沫，大家有目共睹，真係行出呢一步，大家要有心理準備本利歸還。

但凡股市牛三，最大徵兆是投資者信心爆晒棚，無視所有利淡因素，更把短暫震倉視為入市良機。「侵侵」走數風險愈來愈大是其一，聯儲局提出「縮表」也是，科技龍頭蘋果公司季績麻麻，隔晚開市一隊即抽，貼近高位收，埋單僅跌0.3%當正無事發生。

到底音樂椅遊戲幾時結束？無人有預知能力，學股神巴菲特話齋：「水退時先知邊個裸泳」，投資者衝浪的同時最好有兩手準備，洪水一退，成個金融市場會變得好鬼難睇。

滙控現價雞肋味濃

港股昨日過千隻股份見紅，多得滙豐控股（00005）撐住，恒指先至跌得12點咁少，收報24,683點。蘋果公司隔晚響美股低開拗腰固然威威，不過相關零部件供應商就無咁強韌力，瑞聲（02018）同舜宇光學（02382）分別跌3%及4%。

豐盛被淡友咬到實

被沽空機構Glaucus狙擊唱淡的豐盛控股（00607）昨日復牌，挾高17.4%收報2.96元，將四月二十五日落閘當日朝早的跌幅一口氣追凸。睇番該股12.7億元成交，有3.28億元來嚟自沽空，比停牌嗰朝仲多四倍，淡友咬住唔放，雙方陣營對決，可買定花生等睇戲。

昨日食晏期間，滙控派成績表，首季經調整後除稅前利潤59.4億美元（除稅前利潤為49.6億美元），主要係炒房貢獻改善所致。對近年靠慳、靠瘦身，以回購托價的大笨象，由於市場期望唔大，先至有下午市的反高潮，被大孖沙掃到甩轆，一隻股票保住個市下午嚟個鯉魚翻身。

講到底，炒房貢獻能見度較低，且第二輪回購後，無講下一輪會係幾時，去到近67元已有點雞肋味道。

古勝