絲絲講場：朱仔請實習 月薪6萬

美國招聘網站Glassdoor發表今年美國最好賺Intern工排名榜，結果硅谷科技公司佔咗大部分。前十位公司中，除埃克森美孚及彭博通訊社外，其他全部都係屬於科技領域嘅。

IT界幾盡霸十大筍工

科技企業佔咗Intern十大筍工唔少位置，排榜首嘅facebook，Intern月薪中位數係8,000美元（約6.24萬港元），嗱嗱嗱，6.24萬只係中位數，換言之有一半實習生嘅月入仲要高過呢個數！就算齋以中位數嚟計，年薪就相當於9.6萬美元，幾乎係美國打工仔人工中位數（51,336美元）近兩倍。所以應該有好多美國人陪你齊齊葡萄。

你以為只不過係個別例子？No喎，頭四位以內嘅微軟、埃克森美孚同Salesforce（網上軟件生產商），實習月薪中位數亦全部過5萬港元；連排第五至八位嘅Amazon、Apple Inc.、彭博通訊社、Yelp，呢四家嘅Intern月薪中位數全部都係4.99萬港元左右。

咦，咁Google呢？乜江湖傳聞唔係話待遇優厚嘅咩？Sorry，十大冇佢份喎。

余絲韻