Market Insight：內銀股跟大戶坐貨

古勝始終認為，經歷過一五年A股癲市之後，當局有序推進金融市場規範化係一件必要做的事情，否則如此情況下開放市場等於引狼入室；而內部金融體系缺乏完善監管，始終是對經濟長足發展係一項重要的掣肘，所以受金融強監管的消息引發調整相信只屬短暫性，長遠係好事，毋須過於擔憂。

針對加強對銀行業的監管，睇番大行報告，都覺得加強監管唔係壞事，其中瑞信仲話，大型銀行的資產質素較佳、有足夠的資本及穩定派息，受相關政策風險影響相對細，表現有望跑贏同業。

該行並列四家內銀股投資評級為「跑贏大市」，分別為工商銀行（01398）、建設銀行（00939）、中國銀行（03988）以及招商銀行（03968），目標價分別為6.3元、7.9元、4.4元及25元。

咁即係話，嚟緊內銀股應該唔大唔買，而當大型內銀股保持強勢之下，相關政策拖低指數表現的影響亦不會太大。見到昨日H股內銀表現硬淨，大概也說明大戶睇法。

昂納科技守穩5元博得過

法國總統首輪大選結果符市場預期，避險情緒降溫，昨日歐股開市報升。可惜內地股市連日向下走，滬、深A股昨分別跌1.3%及2.1%，故見港股走勢亦較為波動，恒指高開後曾倒跌，之後又回升，埋單計升97點，報24,139點，主板成交僅655億元。

集資即有新搞作

看來本月下旬港股市況轉趨波動，加上本周美國同歐洲都有數據或議息消息，下周又僅得三個交易日，令市場觀望氣氛轉濃，仍留喺場的缸邊友記得要緊握扶手！

呢期魚缸都有唔少批盪活動，好似隻昂納科技（00877），以先舊後新方式配股，配股價5.25元，集資2.63億元，可能由於當中涉及有主要股東減持4,000萬股，故見配股上板後，昨股價一度跌落5.33元，收報5.49元，跌幅11%。不過，公司亦隨即公布擬以1,920萬美元收購一家激光雷達產品生產商，即係配股集資立即確定有新投資。

現時昂納科技市值40億元左右，控股股東O-Net及主要股東深圳長城開發在今次配股完成後仍合共持有公司50.31%股權。

一五及一六年度，公司業務保持較快增長，去年十二月至今，股價由3.4元水平升至上月高位見7.55元，累升最多達1.2倍。由於5元是一個較大的支持位，若短線能企穩在配股價之上，照計博得過，反彈目標上試5.9至6元區域。

五龍電動車謀突破

今年的上海車展現時正在舉行，今年車企主打係電動車概念。從各大內外車企都積極搶灘電動車市場可見，未來車市將會係電動車的天下。

最近就有報道指出，Tesla舵手馬斯克去年單係交入息稅最少達46億港元，主要係行使股票期權，需要就股票期權的行使價與市價之間收益支付入息稅。從Tesla的成功，可見電動車呢個新產業絕對不是夢！

北水率先部署

講到車企，昨日就見到靜咗好耐的五龍電動車（00729）異動，高位搶到上0.385元，收報0.375元，升幅8.7%，成交額1.24億元。呢隻股旗下長江汽車專門生產電動車，都有參與今年上海車展，由於推出電動SUV──逸酷的日期一直未明，股價反覆落到三毫幾子冇起色。

今次股價異動成交都唔細，係咪醞釀咩新進展就要留意公司消息。睇番互聯互通份花紙，在五龍電動車的持倉股數達1.9億股，似乎懂欣賞的北水已先行部署倉位，但股價能否步離低谷，到底還看今年推出逸酷有冇確實時間表。

古勝