股場上有過千隻股票，它們就好似快活谷啲馬匹咁，最少可以分兩種。第一種是跑得快而又有望爭標的，它們本身就已經多人買喇，所以賠率一定不吸引。另一種就不同，它們擺明是來陪跑的，賠率一般都高，用來吸引下注，否則搵鬼買咩！
其實炒股亦都係一樣，本身跑得快的股份，好似騰訊（00700）咁，有幾可要靠高息來吸引人吖？只有那些業績發霉的股份才會增派息來到「息誘」股東啫！
不過，這句說話又不是時時準喎。於今次的業績期入面，竟然無啦啦多了一批異軍，它們就是所謂的「紅包股」，即忽然豪派特別息的股喇！話說於上周五，中國神華（01088）發布了去年業績，純利按年增41%的，質地唔曳，唔似係陪跑，但卻忽然豪派了2.51元人仔的特別息。今次的派息總額是590億元人仔，折合股息18.17%，即時刺激了股價急升！
周一神華股價一開已經升近三蚊，再高追的投資者當然係無肉食啦。所以好多人就關注喇：下一隻紅包股是甚麼？中煤能源（01898）抑或兗州煤業（01171）？我看都不是，能夠成為紅包股的，其資產負債率一定要低於50%，而大股東的持股亦應該於40%之上。
仲有一個問題需要深究，就是忽然間慷慨到底是由中央驅使或企業自發的呢？如果是如神華的高管所言，是自發而不是阿爺指示的，那我們盲目去期待其他公司都可以慷慨解囊，其實係幾一廂情願。
但諗深一層，央企完善分紅機制同提高股東回報，又確實是中央的思路喔！所以我更加相信今年的業績期，是可以支持大市破頂的，先是中國移動（00941）同安徽海螺水泥（00914），再來是濰柴動力（02338）同廣汽集團（02238）。博有好的業績再派特別息，咁炒法一定work（除非唔work！）
富昌金融研究部總監 譚朗蔚（作者為註冊持牌人士）