絲絲講場：賴小民減肥廿磅 多得華融
點樣減肥最有效？中國華融資產管理（02799）董事長賴小民呢個人辦話畀大家知，淨係返工已經係最好嘅減肥方法，賴小民加入咗公司逾8年，就瘦咗成二十幾市斤（即係大概廿磅）！佢自己雖則瘦咗一個圈，但就搞肥咗公司，皆因華融業績非常靚仔，去年賺196億元人民幣，按年多賺逾35%。
華融排隊A股上市
計絲絲話，公司賺大錢，瘦多兩個圈又點話吖，人工花紅嘅進帳絕對抵番晒。華融前幾日停牌，原來係諗住申請A股上市，來一個A加H股齊齊玩。尋日業績會，賴小民話公司的確係排緊隊A股上市，中證監方面已經受理有關申請，暫時未有確實時間表。至於會唔會分拆其他業務？佢就話要再研究一下。
對於小股東嚟講，派幾多息當然重要。華融話，非常重視為股東帶來實實在在效益，去年嘅分紅亦達到30%，而未來派息政策會考慮同業水平同埋資本需要。
不良貸款風險可控
賴小民透露，今年債轉股資產規模目標為300億至500億元人民幣，依家同緊國有銀行探討債轉股合作。而國企業績會又點會唔提不良貸款？佢估計內地未來不良貸款額仍然會繼續上升，不過都係嗰句，覺得整體風險仍然可控，仲話有風險係非常正常，搞金融嘅人就係日日同風險、日日同魔鬼打交道咁話添！賴小民似乎好有信心勝過魔鬼喎。
余絲韻