絲絲講場:盧炳松呻領展3年最辛苦

領展房產基金(00823)大公關盧炳松今年六月退休,佢話自己做咗四十年嘢,喺領展嘅三年最辛苦!

六月約滿「再退休」

因市民對領展嘅觀念仍然停留喺房署年代,所以佢哋成日要應付好多投訴同示威。

其實盧炳松今次係第二次退休喇,事關佢對上响迪士尼份工,做到六十歲已經退休,點知佢一退就畀領展招攬,簽約三年做企業傳訊及對外關係總監,到今年六月到期。

至於佢嘅繼任人何柳鳳(Aubrey)來頭都唔細,之前做過商品交易所同埋瑞銀嘅大公關。

余絲韻