絲絲講場：創科業績會「晒冷」
創科實業（00669）尋日搞咗個業績發布會，絲絲都奇怪緊點解要揀間咁大嘅Ballroom，一入到去先知，原來係要容納晒集團嘅產品！
鑽研新產品 唔打價格戰
現場成個展銷會咁，周圍擺滿起碼幾百款產品，單係電鑽就成牆都係，你都咪話唔震撼！集團CEO Joseph Galli仲一早戴埋無線咪，走落台親身同大家如數家珍，簡直係專業售貨員上身！
財務總監陳志聰話集團唔會打價格戰，亦唔會同競爭對手好似Dyson等鬥平，而係專注於研發新產品，融入智能高科技元素。好似佢哋嘅吸塵機械人，識得分辨吸緊地毯定地磚，部分產品仲可以用手機操控。咁以後大家返到屋企，係咪就可以坐喺度「印印腳」囉？
余絲韻