放慢發展免「謀殺職位」
機械人除咗效率高又任勞任怨外，仲有一個好大優勢，就係唔使交稅。蓋茨話，人類喺工廠打工，假設價值5萬美元，呢份收入係要繳稅嘅，若機械人取而代之，亦應按類似水平交稅，除咗向企業因節省人手所產生嘅盈利抽稅外，亦可直接徵收某種形式嘅機械人稅。
其實，機械人應用愈多愈廣，搶人類飯碗已經唔係疑慮咁簡單。蓋茨認為係時候放慢「謀殺職位」嘅技術發展，仲話如果創新令人覺得驚驚多過興奮，就係件壞事，因為咁反映科技未能正面運用，而徵稅係一個比禁止更好嘅方法。
話說微軟當年憑個人電腦（PC）普及賺到盆滿缽滿，搞到啲打字員要轉行，依家已經係全球首富嘅蓋茨今時今日咁講，唔通係發財立品？
余絲韻