絲絲講場：華訊主席最「息」錫老婆
最期待上市公司派息嘅，何止小股東，相信仲有華訊（00833）主席林賢奇嘅太太，事關身兼公司大股東嘅林主席每次都會將所有股息畀晒太太，完全係「愛妻號」嘅典範。不過都因為咁，林主席近年慢慢淡出馬圈。
棄追愛駒 轉行湊孫
點解？因為每次買新愛駒都要問番太太借錢，結果近年林主席名下七隻「電光」系愛駒陸續退役後，都冇再購入新駒。少咗樣娛樂都唔緊要，林主席話依家轉咗弄孫為樂，同五個孫玩都可以好似入馬場咁熱鬧！
林主席又同大家分享，集團嚟緊會拓展內銷市場，今年八月江西新廠就可以投產。佢仲話新廠附近嘅溫泉好正，想叫埋佢女婿一齊去睇下咁話。咦，佢女婿係縱橫遊（08069）CEO袁振寧，唔知林主席會否考慮埋喺當地投資溫泉業務，話唔定仲可以同女婿合作呢？
余絲韻