港股正式步入了「大時代2.0」，雖然有人唔認同，仲話外圍有好多不利的因素，唔具備大升的條件，仲話要趁高位減持添！但我就認為有貨的粉絲反而應該扣緊安全帶，坐定定去享受升浪就真！
我公司於上周初為我安排了一個同粉絲開年的晚宴，由於全部的參加者都係每日同我透過whatsApp群組征戰沙場的客戶，因此我並無花太多唇舌來說服他們點解要瞓身（事實上，我們自CNH於一月初大翻身以來已經反咗手，一直瞓身到依家）他們關注的只得一個問題，就係「假如升市到盡頭的時候，你有無把握帶我們走，而不會承受好似一五年中一樣的痛先？」
我好明白，要人不要問、只要信咁樣跟住你，你首先要畀佢一個承諾，就係「假如再行係會撞牆的話，我一定會話畀你知！」咁到底個市幾時先會升完，又有無辦法可以知道的呢？我以下有幾個指標可以供參考。
首先，到底咩叫做「大時代」先？係每日300點的升幅？係恒指終於收復返24,000點的關口？都唔係，係每日千億的成交呀。所以，我們首先要關注的是成交何時回落到千億之下，就是牛氣減弱的契機。
第二，一睇就知今浪係由中資同H股受惠資金推動。假如有一日，國指係要跑輸恒指，內銀、內險之類全部要倒跌，而只係靠傳統藍籌，如中國移動（00941），可能係友邦保險（01299）這些燈籠來推動的話，都證明個市變咗質喇！
當然CNH依然要睇住，我們憧憬養老金入市嘛，到頭來政策落實抑或落空呢？都really matters！最後，熱愛睇圖的我當然會為大家mon實個動力指標啦！放心坐啦，無事嘅！
富昌金融研究部總監 譚朗蔚（作者為註冊持牌人士）