Market Insight：內銀股升浪未炒完

美股升浪已經進入自動波的牛三形態，回都唔回連升五日。常言道牛市莫估頂，唔信睇吓舊年美國大選，個個專家都估「侵侵」若然當選，好似世界末日一樣，不過家陣一樣轉軚唱好，今日的我打倒昨日的我。

股市永遠跟紅頂白，順住個勢做，最棹忌係要賭鬥氣錢，結果衰咗都唔知乜事。收市價計，昨日港股升穿舊年九月高位，恒指報24,107點升112點，且有過千億成交配合。

基金聯袂散戶追貨，股市漸有雞犬皆升的味道，唔單只滙豐控股（00005）、騰訊（00700）等重磅股破位，二三線股都十分熱鬧，惟要小心恒指在24,300點阻力唔細，昨日國指開高走低，似是大市短期要先抖氣信號，一於炒股唔炒市，搵啲未開波博佢鑊氣一到即爆上。

美圖公司係時候開車

納指不斷破頂，進入上市最後階段的社交網站Snapchat母企Snap，在美股牛氣沖天下，街外唱緊估值隨時達222億美元。外圍氣氛使然，近排大行紛紛在中資科網股中尋寶，也是騰訊一副唯我獨尊般霸氣盡現的原因。

貨源已入強者手

要搵蟹貨少、未開車，第一時間諗起美圖公司（01357）。呢隻股上市初期潛水，但踏入一月中已返到8.5元招股價樓上，可見公開認購得兩倍幾超購，貨源相對歸邊，接貨強手有能力輕易舞番個股價上去。

在下無用過美圖秀秀，純綷見識過網絡紅人「蛇精男」變臉，更遑論係咪真係發展出電子商務平台，搞過美圖商城出嚟。

睇近排中資TMT股，不問因由輪流發難，貨乾的美圖在9元浮浮沉沉多時，昨日作勢開車，有迹象試衝一月高位9.4元。

業內經營環境漸好轉

資金輪流炒，呢轉內銀股相當突出，中國銀行（03988）、農業銀行（01288）及建設銀行（00939）昨日升幅介乎1.5至2.8%。

多隻內銀股抽升，源於摩笛奏起，近日強勢仲未完，四大內銀均再次破頂，交投相當活躍，其中建行成交額達58.34億元。內銀一向係大媽寵兒，睇番近兩日通過兩條南向渠道買入內銀的金額，其實與往日相若，未見明顯急增。

內銀以往為人詬病的是不良貸款問題，壞帳風險令人擔心，成為長期拖累股價的因素。不過，目前市場似乎對此轉趨樂觀，預期不良貸款率升幅放緩，甚至下降，加上銀行淨息差將擴闊，有助改善盈利。

情況係咪有改善，要睇到實質數據先可以確定，不過既然現時市場炒憧憬，相關股份有資金追捧，大市整體氣氛未有轉差，持貨的不妨睇多一陣，未有貨在手宜候低再吸。

古勝