絲絲講場：高盛600美股交易員變兩個
各位金融財俊睇完上面古仔，覺得唔關你事？睇埋呢個先講，事關全球最Top嘅投資大行之一高盛話，一個電腦程式員能頂替4個交易員！
以自動化程式取代
話說二○○○年時，高盛紐約總部嘅美股交易台有600個交易員，今時今日就只剩番兩個！啲工作由200個電腦工程師（直接啲講，就係程式員）用自動化程式搞掂。呢啲都係高盛位代理首席財務官Martin Chavez上個月喺哈佛大學一個研討會度講嘅，佢話高盛目前有大概9,000個電腦工程師，佔總員工三分之一！
嗱唔止股票，連外匯與期貨，佢哋一樣搞緊自動化交易。唔係交易員就唔使驚？未必，事關啲電腦工程師開始踩埋過M&A（併購）嗰瓣，高盛最近搞咗個內部App（應用程式），話「幫」Junior啲嘅Banker處理搞Deal資料，仲可以等啲Senior嘅Banker遙距Check住單Deal，連問分析員都慳番喎。
連高盛行政總裁布蘭克費恩都講過，佢哋依家係間科技公司多過係間金融公司喎。近排傳有份爭接布蘭克費恩棒個位嘅Chavez，本身係讀電腦科技出身！睇嚟，揸住電腦工程PhD吃香過MBA！
余絲韻