絲絲講場：勁蝦碌財俊「抽資」入唔番銀行？
莫以為專業金融人咩大市風浪都見過，做咩交易都諗到往後有N個準備，其實當為自己嘅血汗錢緊張起上嚟，一樣散戶上身。絲絲就聽到一個金融財俊揸住百幾萬Cash，差啲唔知點存番入銀行嘅故事。
雖然金管局一直努力令香港銀行同貨幣穩定，但不乏人睇淡，群鱷上年想沽空港元之時，連散戶都話「識揸一定揸美金」。絲絲收到風，有位中環專業人士覺得社會動盪，轉揸美金現鈔，規模成20萬美金（約156萬港元），即係2,000張100美元現鈔。
巨額現鈔美金 似洗黑錢
呢位專業人士擺咗啲錢兩年，見股樓齊升，呢幾個月想存入銀行，先發現自己中伏！
點解？銀行家朋友喝住佢，話近年銀行反洗錢好嚴，拎咁大袋美金現鈔入銀行，閣下肯定似洗錢多過似007，隨時畀銀行報警做可疑交易，到時畀人問「點解拎咁多現金」時點答？唔通話唔信香港銀行體系同金管局？呢個理由唔會有人Buy。
其實大額現金提存一直都係銀行重點關注交易，你唔知唔出奇，但佢係金融專業……
搵親友分批兌回港元
結果班銀行家Friend教路，要搵親戚朋友幫佢分批將20萬美元先兌番港元，然後每人再分批、分幾個月畀番佢，再存入銀行，而且每次開票同轉帳都要唔同銀碼，希望減低觸動銀行神經嘅機會。
結果？位仁兄就過咗一個好充實嘅雞年新春，就係拜年時同姨媽姑姐兄弟拍膊頭「唔該幫手去銀行兌番做港紙畀我」！
余絲韻