絲絲講場：林正宏八歲女有錢途
趁住新年細路收利是，好多家長都趁機會同仔女講吓儲錢與理財，康宏理財助理聯席董事林正宏（Perseus）就有兩個可愛囡囡，大女依家8歲，細女6歲，佢話尤其大女已經開始對錢銀好緊張，不過只限於緊張自己嘅錢。
私己錢慳住使
Perseus同絲絲講，有次佢接大女放學，囡囡想食燒賣，Perseus專登話要食冇問題，但要囡囡用自己錢。一聽到要用自己錢，囡囡好精靈話「我唔買喇！」嗱，冇扭計。
仲有呢，Perseus話大囡囡揀眼鏡亦有佢自己一套，首要條件唔係款幾靚、幾潮，而竟然係要夠平！會咁諗嘅小朋友今時今日的確好罕有，絲絲要讚句阿林爸爸叻叻。
余絲韻