絲絲講場：里昂：港股或七月見頂
中信里昂證券尋日發表二○一七年雞年風水指數，以純風水角度為個市把脈。雖則佢哋話風水指數只係「博君一笑」，但佢哋舊年話六月廿四日係大凶日，英國嗰日公投脫歐，拖累恒指一度瀉1,205點喎！嗱里昂今年就咁睇。
里昂話雞年五行上屬火，二至四月水較多，水剋火，恒指自然就平淡啲。五至七月，火會旺起嚟，恒指亦迎來升市，七月七日至八月六日期間會見頂。八月至十一月較波動，到咗十一月至出年一月，水會返嚟淋火，令恒指受壓咁話喎。
總括講，恒指雞年港股有望正回報，但未必一帆風順，事關雞動作敏捷，寓意今年買股要度啱時機。
買樓宜揀北避南
今年東位歲破兼三殺，南有五黃煞星，西位犯太歲，只得北位好啲。因此置業以偏北嘅沙田同粉嶺最好。里昂仲話，即使人仔再貶值，「北京表親都會身着華服、帶住成噸現金前來」，預料上水區地產Keep住熱。至於正南方嘅淺水灣同石澳等地區就……信嘅就避吓好。
看好內地 A股料揚
里昂話，中國位處香港北面，北面好；新中國喺屬土嘅一九四九年成立，火生土，好；四九年屬牛，牛又係今年運程最好嘅生肖，更好。結論係：內地A股會好！
都係嗰句，風水術數並非精密科學，信不信由你。而絲絲就梗係……
余絲韻