大蒜可以用嚟「炒」，絲絲講嘅係除咗用嚟炒菜之外，仲可以用嚟炒賣。據內地商務部資料，大蒜價格自舊年起升咗超過80%！除咗因為時雨時雪嚴重影響收成外，當然唔少得內地大媽「乜都炒」嘅習性。邊有乜都炒？係嘅，只怪樓市調控，熱錢被迫去炒蒜頭，明嘅。
但內地無大蒜期貨，咁點炒？照炒可也。睇價升嘅，就買入實物大蒜囉，啲大蒜炒家一般以山東東部金鄉縣作據點，啲現代化冷凍儲存設施仲大過足球場，可以將大蒜保鮮長達兩年。聽講好多Trader走去嗰度買五個、十個倉庫堆滿蒜頭，等價升時慢慢沽，利潤以百萬美元計！
除咗「炒」，大蒜仲可以作為內地通脹探熱針。○七年大蒜價格急漲，中國消費物價指數（CPI）之後一年就由2%急升至8%；○九年中，大蒜價格亦於CPI攀升前率先上揚，通脹到一一年尾先到頂。真正係，「蒜」你有用！
余絲韻