絲絲講場：快Beat歐達禮「神校」出身

歐達禮喺八二年攞到倫敦大學法律學士學位，八三年再獲劍橋大學法律碩士學位，更以一級榮譽畢業。佢喺倫敦取得執業資格，之後喺香港執業逾廿年！

雖則中環與金鐘成街律師，但喺「神校」劍橋法律系仲係攞1st Hon嘅，就真係絕對唔簡單。

證監高層多1st Hon

絲絲聽聞，曾經同歐達禮合作過嘅人，都唔係好跟到佢嘅「思考」步伐，簡單嚟講係甩咗！有次歐達禮公開演講，佢當然係講英文，但就連洋人都唔係好Get（收）到佢究竟想講乜，要消化一大輪，甚至要高人指點，至收到歐達禮想要傳遞嘅重要訊息！唔，果然係非一般嘅轉數。

講開又講，原來證監會都有唔少高層當年同樣係1st Hon畢業，證監會中介機構部執行董事梁鳳儀亦喺香港中文大學以一級榮譽畢業，並持有紐約哥倫比亞大學新聞碩士學位。

等你仲恃年輕Hea住過，遲啲先發力洗底？喂，無論黑豬定白兔印，都會跟一世！

余絲韻