北水頭等倉：粵投揸中線有得諗
內地股市急跌，港股無運行，恒指跌見三舊幾，美國議息前大市承接更加薄弱。此刻難得輕裝上路，想抄底莫心急。上周五香港突然又走出一隻黑天鵝，睇嚟未來六個月啲政策可能會亂亂哋，對港股影響都係唔好多過好。多事之秋，相信指數唔會有咩好表現，股市頂多是炒作個別主題，而仍留在場玩的炒家愈來愈少。
基本因素仍穩定
呢個局面，證明滬港通、深港通雖然經已開通，但港股市場估值仍不離基本因素，經歷過去年大時代的上大人，亦唔會再傻到去谷高港股畀外資做淡。筆者仍然相信，互聯互通只會在極端情況下港股估值跌至嚴重偏離基本因素時，才會發揮其正面作用。
今年下半年本港IPO市場芬佬根本搵唔到食，所以聽到有女股神話要暫別港股，並不足奇。事實上，基金年結將至，成績得定唔得，有冇得留低，醜婦終需見家翁，可以炒匯的對沖基金，呢兩個月多數靠炒外匯拉上補下，否則份成績表更加唔見得人。
對於明年投資主題，此刻芬佬亦都答唔出，至少要等呢個月美息趨勢是否明朗化及一月特朗普上任後動向，先至能夠掌握。有理由相信，明年第一季投資市場都係食白果，去吓長途旅行可能比留在魚缸磨爛蓆划算。
仍留在場的資金，傾向揀避險股停泊。季內美元強勢之下，高息股回落幅度不少。粵海投資（00270）本月初失守250日線後反覆尋底，至昨日收報10.42元，逆市升1.5%，顯見估值已回落至重新吸引投資者目光水平。以現價計往績市盈率16倍，息率3.2厘。在基本因素未大變下，短線股價回落至10元邊，不妨留意中線收集機會。
司慕渢