Market Insight：內需股宜選擇吸納

北水主導後市表現

今年第四季，美元強勢，資金回流美國是主流，美股上周五又再創新高，日圓顯著轉弱，中國就備受嚴重的走資問題困擾，人仔貶值，外儲減少。在這個大環境下，A股實在難有大作為。

昨日受滬綜指及深成指分別跌逾2%及4%拖累，港股跌327點收報22,433點，主板成交777億元。事實上，除A股因素外，上周五香港政局發生巨變，政治不明朗亦難免會令港股迷失方向。不過，有一點慶幸是，本季資金大舉流出回流美國，基本上現時的港股外資參與不多，嚴格而言已由阿爺揸莊。除非北水大規模撤退，否則港股應該只會跟跌，而唔會演獨腳戲。魚缸人氣低迷，繼續消磨投資者的意志。

昨日A股出咁大支陰燭，古勝梗係第一時間跟表叔股友收吓風，得到的答案係今浪滬綜指要「飛流直下2,800」，即係話仲有一成要跌！若然如此，係咪應該提早收爐，就留待大家自行判斷。

康師傅蒙牛較值博

百麗國際（01880）上周五公布第三季度營運數據，鞋類業務仍然疲弱，同店銷售下跌13.4%，運動、服飾業務就有4.6%的增長。摩根大通發表報告，指百麗表現差過預期，維持「減持」評級，目標價4元。

百麗料低位喘定

其實自十月底公布中績後，百麗股價已經跌咗1蚊有多，上周初先有少少起色，一個季績出爐又打回原形。不過，再大跌的空間或有限，短期繼續喺低位徘徊的機會較大。

睇埋其他內需股，康師傅（00322）及蒙牛乳業（02319）業務同走勢均有改善，值得留意。前者第三季收入及純利按年跌大約1%，來自即食麵收入的跌幅收窄；後者產品結構改善，市場普遍預期集團下半年盈利將回穩。康師傅股價沿10日線上升，守9元樓上，後市有望挑戰10元水平。

蒙牛上月破頂後仍喺高位上落，可候低於15.2元附近吸納，博再試高位。

iPhone概念股要減持

油組與非油組成員達成減產協議，油價急升，昨日見到石油股跑贏大市。

其實，除咗石油供應能見度提高之外，美息趨升以及中美關係轉趨緊張，地緣政治風險升溫，甚而要動干戈，油價都有上升條件。

之但係，「侵侵」在選舉時講過，全球暖化係中國製造的騙局，藉以打擊美國製造業，更委任長年發表否認人為因素是導致氣候變化言論的人出任環保及能源部門的過渡小組領導，又話未來要力推燃煤發電，支持可在海岸、北極圈鑽油等等。若然呢啲言論真係兌現，「侵侵」猶如地球殺手，美國石油供應增加，油價自然缺乏上升條件。

所以話，呢位仁兄當選，全球投資者都有排煩，相信最快要到明年次季，全球資金流向才有望再出現變化。

古勝相信，過去食正蘋果代工熱潮的一眾手機零部件生產商，未來業務發展亦可能有變數，如瑞聲科技（02018）、舜宇光學（02382）、信利國際（00732）及富智康（02038）等，預計明年首季會有震盪，此刻宜盡量迴避，有貨宜睇位趁機減持，尤其係隻舜宇今年以來累升幅度仍多，十一月以來的沽空量較十月增加，持貨者宜好自為之。

古勝