華資銀行講究飲饌，恒生銀行（00011）嘅蛇宴、上海商業銀行嘅滬菜、永隆銀行嘅閣樓宴會都係城中佳話，就連一般員工嘅飯堂都絕不馬虎。
絲絲就聽聞，永隆銀行飯堂唔止員工免費有伙食，大時大節仲會有鮑魚同龍蝦，真係聽到都肚餓！
永隆銀行個飯堂就喺總行五樓，員工拍一拍卡就入得，提供嘅湯水，永隆銀行司庫蕭啟洪都讚好。其實佢哋唔止中環總行包伙食，連旺角總行員工都有呢個福利。
至於分行同事呢，雖然唔會返到總行食，但銀行同樣有膳食津貼！所以話華資行有人情味，唔止冇話裁員，仲好照顧員工個五臟廟添。
余絲韻
