絲絲講場：愛得威敲鑼離奇現「象」
建築公司拖隻泰象去港交所掛牌？同上市行動秘密代號有關？
是咁的，話說廣東愛得威建設（06189）尋日首日掛牌，帶咗隻大象雕刻工藝品送畀港交所（00388）做上市禮物。
上市保密 代號「金象」
之但係絲絲諗極都唔明一間建築公司同泰象究竟有咩關係呢？公司解釋原來佢哋今次上市項目代號叫「金象項目」（Project Elephant），所以公司就用大象工藝品做禮物囉！
查實上市公司上市前為咗將所有文件同財務數字保密，都會編制項目代號，減低消息對外流出或啲唔相關人接觸到內幕訊息嘅機會。當年阿里巴巴喺美國上市，就有傳用「阿凡達（Avatar）」做項目代號。
講番隻象先，絲絲見佢披住波斯風嘅流蘇毛氈、背上頂住一個葫蘆形嘅金壺，腳上仲戴有金環，雖然唔知有無特別象徵意義，但單睇呢隻大象打扮咁華麗就知係匠心獨運。
余絲韻