絲絲講場：大媽揀股讀音似就炒

話說，上周三（十一月九日）美國總統大選結果顯示特朗普（Trump）跑出，一間深圳上市軟件公司股價竟然突然爆升超過9%！點解？原來呢家公司中文名係「四川川大智勝軟件」，內地股民聽起來諧音似「川普大勝」（註：「川普」者，Trump也）。

同日，另一家深圳上市汽車零件生產商股價就勁插10%，嗱，呢間公司個名叫「雲南西儀工業」，普通話諧音「希姨」（Auntie Hillary，即希拉妮姨姨）。

到依家，大選完都成個星期，常人大概都應該知道嗰啲公司同特朗普或希拉妮無關，斷估股價回復正常？哈，「希姨」西儀工業由周三至尋日仍累跌超過9.9%，至於「川普大勝」川大智勝軟件則仍累升4%以上，股價仲高過大選前！

燒埋阿女嗰疊

今次連萬科都關事？特朗普阿女伊萬卡（Ivanka）個名，普通話發音聽落似「愛萬科」，萬科A股股價上周三大選有結果當日勁飆近9%，不過同日香港上市嘅萬科（02202）就反而跌0.72%。所以話，呢啲炒股奇技，香港股民邊有潛質學得嚟。

余絲韻