理財Campus：股樓投資 博士級競技

Ben Sir 400呎換到千呎豪宅

「好似外匯、股票咁，係一啲數字，無真實感，但樓係見得到、摸得到。」講起買樓，博士級的現任香港中文大學中國語言及文學系高級講師Ben Sir迅即眉飛色舞，而他獨愛「磚頭」，其實亦有一段故事。

90萬買筲箕灣盤起步

話說Ben Sir年方廿四，即被家人催促買樓，惜他硬頸，直至他親眼見證樓價於八十年代大跌後，竟可反彈兼大升，始發現家人講話有理，「當時跌到千幾蚊呎，竟然升得番，就發現買樓呢個遊戲玩得過」，於是購入筲箕灣一個價值90萬元的單位收租。

曹宏威現時投資前會先分析大局走勢，再與朋友分享心得。（羅錦鴻攝）

兩大學者投資心得

四年過去，筲箕灣物業升值，加上與女友「拉埋天窗」，Ben Sir將物業售出，扑錘買入柴灣杏花邨一個800方呎單位，樓價逾500萬元，但當時的他仍屬投資新手。

直至九七年金融風暴，樓價大跌，Ben Sir的杏花邨未能獨善其身，但唯獨某區抗跌力之強令他咋舌。「當時見到堅道單幢式物業又舊又殘，冇一樣嘢好過杏花邨，但抗跌力竟然咁勁，就諗唔同地區真係咁重要？」他如夢初醒，把心一橫賣出杏花邨單位，搬與家人同住，日日揭報紙，勢要搬進半山。直至列拿士地臺新盤開賣，Ben Sir以不足400萬元購入單幢式物業的單位，一住便是十年。

Ben Sir其後「韜光養晦」，終於一晚－－「喂，老婆，買樓喇」。○八年金融海嘯，樓價重挫，西半山輝煌臺一個400方呎單位僅售320萬元，但Ben Sir仍然議價至300萬元以下，他亦由揸一層樓變成揸兩層樓。

後來列拿士地臺單位「升番上幾開心嘅價錢」，Ben Sir決定售出，自租銅鑼灣單位，另一單位繼續收租，但因着「有罪就係身痕，有錢就係罪」，Ben Sir吼中一個雍景臺千呎單位，價值1,250萬元，超過預算50萬元。他費煞思量，豈料這一想，令他後悔至今。「只係過咗四日，佢咁就賣咗喇，只係差50萬元……」

吼實跌市 首選半山

自此一役，Ben Sir換樓心意更堅，四處格價，更售出輝煌臺單位「All in」，最終以1,300萬元購入雍景臺低層單位，揸兩層樓又變回揸一層。

Ben Sir總結，大跌市時一定要買樓，且要揀啱地區，首選半山物業；建議年輕人早接觸投資，多作準備；而何以金融才俊朋友都捕捉不到時機，自己卻能不斷「升呢」，他表示，「係因為我有時間研究，人哋玩車玩股票，我就將廿幾年精力都放喺樓，機會嚟到就可以最快作出決定。」

曹宏威 夫妻合作 謹記三「不」

投資除了有「要做」事項，亦有「不做」事項。曾任香港中文大學生物化學系客席教授的曹宏威投資屢次「中伏」，昔日購入息率奀的儲稅券，遭人訕笑；在老友飯局收料後小注某股，不料暴跌，他苦口婆心奉勸一句－－「唔好受人影響！」

誤信貼士 入市損手

曹宏威投資作風穩健，年輕時儲錢為上，每月可儲七成薪金，若非公務，絕不旅行。「你話我聽旅行有咩好去先，睇風景，上網大把，我連新加坡都未去過。」他更笑言，當年與女朋友往美國留學，兩人平日花費不多，偏租房子貴，於是他提議女友「不如結婚，咁就可以一齊住。」

他「獨沽一味」，主要將財產放在銀行收息，後來受人慫恿，將所有資產購入儲稅券，豈料息率反不及銀行，雖不至蝕錢，但就被人笑作笨蛋；近年，他於一場老友飯局中，聽到「貼士」，當時雄心壯志，花費唇舌與太太解釋，最終決定入市一試真偽，換來的是股價暴跌。

於是他領略到，投資時須謹記三「不」：不要三心兩意；不要急功近利；不要受人影響。

睇大局 留意能源股

現時投資，他與太太分工合作，自己「睇大局」，分析全球政經局勢，閒時與朋友組成的「咖啡黨」分享心得，太太則留意股票細節、動手操作。

以能源股為例，他以前醉心研究太陽能，雖然知道技術進步有限，但因為太陽能板可鋪置的面積增加，可產生的能量自然相應增加，再者，留意到內地積極發展潔淨能源，故特別看好能源板塊前景。